O‘zbekistonda tadbirkorlarga valyuta ayirboshlash xizmatlarini ko‘rsatishga ruxsat berilishi mumkin

O‘zbekistonda tadbirkorlarga valyuta ayirboshlash xizmatlarini ko‘rsatishga ruxsat berish rejalashtirilmoqda. Bu haqda prezidentning “Raqobat muhitiga salbiy ta’sir ko‘rsatadigan to‘siqlarni bartaraf etish va tadbirkorlik faoliyati yo‘nalishlarini yanada kengaytirish chora-tadbirlari to‘g‘risida”gi qarori loyihasida ko‘zda tutilgan.

Hujjatga ko‘ra, 2022-yilda xorijiy davlatlar tajribasidan kelib chiqib, norasmiy valyuta operatsiyalari vujudga kelishining oldini olish, shuningdek, xizmatlarni uzluksiz ravishda (24/7 rejimda) ko‘rsatish imkonini yaratish maqsadida xususiy tadbirkorlarga valyuta ayirboshlash xizmatlarini ko‘rsatishga ruxsat berish rejalashtirilmoqda.

Shuningdek, moliyaviy xizmatlar ko‘rsatish bilan shug‘ullanuvchi tadbirkorlik subyektlariga kredit uyushmasi xizmatlar bozoriga kirish imkoniyatlarini yaratish ko‘zda tutilgan.

Loyiha iqtisodiyotning monopollashuvi yuqori bo‘lgan ayrim sohalarda raqobat muhitini rivojlantirish, xususiy sektorga beriladigan, shu jumladan, davlat xususiy-sheriklik asosida jalb qilinadigan faoliyat turlari uchun teng raqobat shartlarini, shuningdek, tovar va moliya bozorlarning samarali faoliyat ko‘rsatishi uchun keng imkoniyatlarni yaratish maqsadida ishlab chiqilgan.

Ushbu hujjat loyihasi muhokamasi 31-dekabrga qadar davom etadi.

Eslatib o‘tamiz, Oliy Majlis Qonunchilik palatasi deputati Rasul Kusherbayev Facebook’da jonli efirga chiqib, o‘zi istiqomat qiladigan Yangiyo‘l shahrida 27-noyabr, shanba kuni bir soat davomida valyuta ayirboshlash shoxobchasini izlagani, biroq ularning barchasi yopiqligi sabab 50 dollarni “qora bozorda” almashtirishga majbur bo‘lganini yozib, Markaziy bankni tanqid qilgandi. Holatga Adliya vazirligi munosabat bildirib, uning bu harakatini qoralagandi. Vazirlik Qonunchilik palatasi deputati sifatida Rasul Kusherbayev o‘z vakolatlari doirasida masalani tizimli hal qilish maqsadida tegishli so‘rov bilan mutasaddi idoralarga murojaat etishi, valyuta sohasidagi qonunlarga o‘zgartirish bo‘yicha tashabbus bilan chiqishi ham mumkin bo‘lganini ta’kidlab o‘tgan.