«Ўзбекнефтгаз»га тегишли заправкаларда Аи-80 бензин нархи 6500 сўм этиб белгиланди

«Ўзбекнефтгаз» АЖга қарашли АЁҚШларда 17 декабрь кунидан бошлаб Аи-80 маркадаги бензин 6890 сўмдан арзонлаштирилиб, ҳар бир литри учун 6500 сўм нархда сотувга чиқарилди. Бу ҳақда «Ўзбекнефтгаз» матбуот хизмати хабар берди.

Маълум қилинишича, Ўзбекистонда бензин тақчиллигининг олдини олиш ва унинг нархларини арзонлаштириш борасида «Ўзбекнефтгаз» АЖ, Монополияга қарши курашиш қўмитаси ва «Товар хом ашё биржаси» АЖ ҳамкорлигида чора-тадбирлар ишлаб чиқилган.

Натижада «Ўзбекнефтгаз» АЖга қарашли АЁҚШларда 17 декабрь кунидан бошлаб Аи-80 маркадаги бензин ҳар бир литри учун 6500 сўм нархда сотувга чиқарилган.

Таъкидланишича, республика ҳудудидаги «Ўзбекнефтгаз»нинг барча АЁҚШларда бензин шу белгиланган нархда сотилиши таъминланади.

Аввалроқ «Ўзбекнефтгаз» АЖга тегишли АЁҚШларда бензин тақчиллиги кузатилгани сабабли ижтимоий тармоқларда танқидий муҳокамалар бўлгани, шундан сўнг компанияга тегишли заправкаларда Аи-80 бензини нархи пасайгани ҳақида хабар берилган эди. Шунингдек, Ўзбекистонда бензин нархи ҳақида маълумот берувчи Telegram-бот ишга туширилиши маълум қилинганди.

Эслатиб ўтамиз, 17 ноябрдан буён биржа савдоларида Аи-80 бензинининг нархида тушиш кузатилмоқда. Шу куни савдоларда бензин нархи 9 миллион 365 минг сўмгача тушиб, 15 ноябрга нисбатан 8 фоизга арзонлашган. 18 ноябрь куни эса 9 миллион 180 минг 500 сўмга пасайиб, 9 фоизга арзонлашган. 22 ноябрь ҳолатига кўра бензин нархи ҳамон тушишда давом этмоқда. Биржа матбуот хизматининг маълум қилишича, 15–21 ноябрь кунлари бензиннинг кунлик ўртача нархлари маҳсулотнинг бир тоннаси учун 10 129 400 сўмдан 9 168 400 сўмгача, яъни 9,5 фоизга пасайган. 23 ноябрь куни Ўзбекистон биржа савдоларида Аи-80 маркали бензин нархи бир ҳафтада 15 фоизга арзонлашгани маълум бўлди.