Qibraydagi yana 8 ta mahalla, 3 ta maktab va 5 mingdan ortiq turar joylar Toshkent shahri hududiga o‘tkazildi

Davlat kadastrlari palatasining Toshkent viloyati boshqarmasi Qibray tumanidan Toshkent shahrining Yashnobod tumaniga o‘tgan ijtimoiy obyektlar to‘g‘risida ma’lumot berdi.

Ma’lum qilinishicha, Oliy Majlis Qonunchilik palatasining Toshkent viloyati va Toshkent shahri chegaralarining o‘zgarishi yuzasidan tegishli qarori ijrosi yuzasidan hududlarda bir qator ishlar amalga oshirilgan.

Xususan, Kadastr agentligi va Davlat kadastrlari palatasining Toshkent viloyati boshqarmalari tomonidan hududlarda olib borilgan xatlov ishlari natijalariga ko‘ra, Qibray tumanidan Yashnobod tumaniga jami 2107,4 gektar yer, shundan 1002,6 gektar qishloq xo‘jaligi yer maydoni hamda quyidagi ijtimoiy obyektlar o‘tkazilishi ta’minlangan:

• mahallalar — 8 ta;
• noturar joylar — 195 ta;
• turar joylar — 5091 ta;
• maktablar — 3 ta;
• maktabgacha ta’lim muassasalari — 1 ta;
• diniy muassasalar — 2 ta;
• qabristonlar — 2 ta;
• tibbiy muassasalar — 1 ta.

Qibray tumanidan Yashnobod tumaniga o‘tayotgan aholining doimiy yashash manzili Toshkent shahri Yashnobod tumani etib belgilangan.

Avvalroq Zangiota tumanidan Toshkent shahrining Sergeli tumaniga o‘tkazilgan ijtimoiy obyektlar, Qibraydagi 13 ta mahalla Toshkent shahri hududiga o‘tkazilgani to‘g‘risida xabar berilgandi.

Eslatib o‘tamiz, 2020-yilning 5-avgust kuni Shavkat Mirziyoyev Toshkent shahri va Toshkent viloyatining o‘zaro chegaradosh bo‘lgan tumanlari hududlarini o‘zgartirish bo‘yicha tayyorlangan loyihalar taqdimoti bilan tanishgandi. O‘shanda aholiga qulaylik yaratish maqsadida shahardan Toshkent viloyatiga 1010 gektar, viloyatdan poytaxtga 10 196 gektar yer maydoni o‘tkazilishi rejalashtirilgan edi. Keyinroq Ulug‘bek shaharchasining aholisi Toshkent viloyati tarkibiga, shuningdek, Uchtepa tumani yashovchilari uchta mahalla Toshkent viloyatining Zangiota tumani tarkibiga o‘tkazishga qarshi chiqqandi.

2021-yil iyul oxirlarida Xalq deputatlari Toshkent shahar kengashi qarori bilan poytaxtning Sergeli, Bektemir va Mirzo Ulug‘bek tumanlari hududi Toshkent viloyatining Zangiota, Qibray, Yuqori Chirchiq va O‘rta Chirchiq tumanlari hisobiga 7,8 ming gektardan ko‘proqqa kengaytirilgani ma’lum bo‘ldi.