Xorazm viloyatining Shovot tumani hokimi Hakimjon Otaxonov jarrohlik amaliyotini boshdan o‘tkazgani tufayli 1 oydan buyon davolanishda ekani ma’lum bo‘ldi.
Tumani hokimining 13-noyabrda imzolagan qarorida keltirilishicha, u tibbiyot shifokori xulosasiga ko‘ra sog‘ligini tiklab davolanishi lozim bo‘lgan. Shu sababli u sog‘lig‘ini tiklaguniga qadar tumanga vaqtincha rahbarlik qilish hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Bahrom Otajanov zimmasiga yuklatilgan.
15-dekabr kuni Hakimjon Otaxonovning tegishli qarori bilan tuman hokimligi boshqaruvchilik hujjatlariga vaqtincha imzo chekish huquqi bilan hokim vazifasini vaqtincha bajarish tuman hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari Azamat Yakubov zimmasiga yuklatilgan.
Azamat Yakubov ham Hakimjon Otaxanov sog‘lig‘ini tiklab ish faoliyatiga qaytguniga qadar tumanga rahbarlik qilishi belgilangan.
“Daryo” ushbu holat yuzasidan tuman hokimi matbuot kotibi Mehribon Iskandarovadan izoh oldi. Uning so‘zlariga ko‘ra, Shovot tumani hokimi Hakimjon Otaxonov suyak yemirilishi bo‘yicha jarrohlik amaliyotini boshdan o‘tkazgan. Davolanish muolajalari uzoq vaqt talab etgani sababli hokim hozircha ishga qaytmagan.
Izoh (0)