Pokistonning Islomobod va Karachi shaharlaridan Toshkent shahriga muntazam aviaqatnovlar amalga oshiriladi. Bu haqda Transport vazirligi xabar qildi.
Ma’lum qilinishicha, bu bo‘yicha Transport vazirligida Pokiston Islom Respublikasining mamlakatdagi elchixonasi va Pokiston xalqaro aeroporti (PIA) rahbariyati ishtirokida uchrashuv bo‘lib o‘tgan.
Qayd etilishicha, 2021-yilning o‘zida aeroport xizmatlari uchun yig‘imlar 42 foizga qadar tushirilgan. Ziyorat turizmi yo‘nalishida bajariladigan parvozlarga esa 50 foizga qadar chegirmalar berilgan.
PIA aviakompaniyasining O‘zbekistondagi vakili Muhammad Vakkos Islomobod—Toshkent va Karachi—Toshkent yo‘nalishida muntazam aviaqatnovlarni yo‘lga qo‘yish bo‘yicha rejalari bilan o‘rtoqlashgan. Aviakompaniya ushbu yo‘nalishlarda parvozlarni 2022-yil yanvar oyidan yo‘lga qo‘yishni maqsad qilgan.
“Uchrashuv yakunida tomonlar belgilangan yo‘nalishlarda muntazam parvozlarni yo‘lga qo‘yish yuzasidan hamkorlikda ishlarni davom ettirishga kelishib oldi”, — deyiladi xabarda.
Avvalroq Uzbekistan Airways oradan 6 yil o‘tib, Toshkent va Kiyev o‘rtasida aviaqatnovlarni tiklayotgani, Rossiyaning SmartAvia kompaniyasi Farg‘onaga muntazam qatnovlarni yo‘lga qo‘ygani, Qatar Airways’ning O‘zbekistonga muntazam parvozlari 17-yanvardan boshlanishi, O‘zbekiston va Afg‘oniston o‘rtasida to‘g‘ridan to‘g‘ri aviaqatnovlar amalga oshirilishi xabar qilingandi.
Izoh (0)