O‘zbekiston Eronning Chabahor portidan birgalikda foydalanish bo‘yicha kelishuvga qo‘shilish niyatida, deb xabar bermoqda Spot.
Ma’lum qilinishicha, 15-dekabr, seshanba kuni Hindiston, Eron va O‘zbekiston vakillari videomuzokaralar o‘tkazgan. Qayd etilishicha, Toshkent allaqachon Eron janubidagi port orqali tranzitni rivojlantirish tashabbusiga qiziqish bildirgan.
“Eron Islom Respublikasi O‘zbekiston hukumatining Chabahor porti imkoniyatlaridan foydalanmoqchi ekanini olqishlaydi va Shahid-Beheshti terminali orqali savdoni rivojlantirishni rejalashtirmoqda”, — degan Eron port tashkiloti rahbari Ali Akbar Safoyi.
Xabarda aytilishicha, Eron tomoni Hindiston va Markaziy Osiyo davlatlari bilan hamkorlik tufayli Chabahorda faollik oshishini kutmoqda. Afg‘oniston ham muzokaralarda ishtirok etmoqda.
Hindiston portlar va dengiz transporti vaziri o‘rinbosari Sanjiv Ranjanning qayd etishicha, Chabahor Hindiston va Markaziy Osiyo mintaqasi o‘rtasida barqaror yuk tashish xizmatini ta’minlaydi.
O‘zbekiston Transport vazirligi vakili Abdusamad Mo‘minov 2020-yil davomida O‘zbekiston—Hindiston o‘rtasida tovar ayirboshlash hajmi sezilarli darajada oshganini va portning mintaqaviy aloqalarni rivojlantirishdagi o‘rnini ta’kidlagan.
“Yaqin kunlarda O‘zbekiston delegatsiyasi Chabahorga tashrif buyuradi”, — deya qo‘shimcha qilgan Mo‘minov.
Ta’kidlanishicha, so‘nggi yillarda O‘zbekistonda yuklarni yetkazib berishning janubiy yo‘nalishi ishlab chiqilmoqda. Bu yo‘l bilan dengiz portlariga borish boshqa yo‘nalishlarga qaraganda tez va arzonroq. Shu maqsadda Termiz Cargo Center terminali tashkil etildi.
Ta’kidlanishicha, so‘nggi yillarda O‘zbekistonda yuklarni yetkazib berishning janubiy yo‘nalishi ishlab chiqilmoqda. Bu yo‘l bilan dengiz portlariga borish boshqa yo‘nalishlarga qaraganda tez va arzonroq. Shu maqsadda Termiz Cargo Center terminali tashkil etildi.
2021-yil noyabr oyida O‘zbekiston Pokiston orqali birinchi tranzit yuklarini jo‘natgan. O‘z navbatida Pokiston O‘zbekistondan kelayotgan va ketayotgan yuklarning Gvadar, Karachi va Qosim portlari orqali tranzit o‘tishini osonlashtirdi.
Biroq yo‘nalishning rivojlanishiga Afg‘onistondagi vaziyat to‘sqinlik qilmoqda. O‘zbekistonlik yuk tashuvchilarga ko‘ra, avvallari afg‘on bojxonalaridan o‘tish korrupsiya, toliblar kelganidan keyin esa inspektorlarning kasbiy mahorati yo‘qligi sababli murakkablashgan.
Mavzuga doir: “Afg‘oniston so‘zi hamon tadbirkorlarni qo‘rqitadi”. “Tolibon” davrida Afg‘onistondagi o‘zbek biznesi haqida
Avvalroq O‘zbekiston, Afg‘oniston va Pokiston o‘rtasida Termiz—Mozori Sharif —Kobul—Peshovar transafg‘on temiryo‘li qurilishi loyihasi haqida xabar qilingandi. Shavkat Mirziyoyev loyiha haqida fikr bildirib, “Men buni asr loyihasi deb atayman”, degandi. Prezidentning ta’kidlashicha, Eron va Pokiston portlariga yo‘llar ochilishi O‘zbekiston foydasiga xizmat qiladi.
Shuningdek, Shavkat Mirziyoyev 2021-yilning 5-aprel sanasida Eron tashqi ishlar vaziri Muhammad Javod Zarifni qabul qilgandi. Unda Eronning dengiz portlaridan samarali foydalanish hamda O‘zbekiston–Turkmaniston–Eron–Ummon transport yo‘lagini rivojlantirish borasida fikr almashilgan.
Izoh (0)