Qashqadaryo viloyatining G‘uzor tumanida 42 yoshli erkak jasadi ko‘chadan topilgani xabar berilgandi. Bosh prokuratura axborot xizmati rahbari Hayot Shamsutdinov mazkur xabar ortidan G‘uzor tuman prokuraturasi tomonidan qo‘shimcha o‘rganish ishlari boshlab yuborilganini ma’lum qildi.
“ ‘Daryo.uz’ saytida ‘G‘uzorda 42 yoshli erkak ko‘chadan o‘lik holda topildi. Marhumning yaqinlari uning o‘ldirilganini aytmoqda’ nomli xabar chiqarilgan. Xabarda ko‘rsatilgan holatlarga aniqlik kiritish maqsadida G‘uzor tumani prokuraturasi tomonidan qo‘shimcha ravishda tergovga qadar tekshirish harakatlari olib borilmoqda”, — deydi bu haqda munosabat bildirgan Hayot Shamsutdinov.
Qo‘shimcha qilinishicha, viloyat prokuraturasi tomonidan tekshirish ustidan nazorat ham o‘rnatilgan bo‘lib, o‘rganish natijalari haqida batafsil ma’lumot beriladi.
Eslatib o‘tamiz, avvalroq G‘uzor tumanida 42 yoshli erkak ko‘chadan o‘lik holda topilgani, marhumning yiqilib o‘lganiga ishongan yaqinlari esa sud tibbiy ekspertiza xulosasini olganidan so‘ng voqeada qotillik alomati bor degan shubhaga borayotgani aytilgandi.
Bu haqda “Daryo” muxbiri bilan suhbatlashgan marhumning bevasi mazkur voqea bilan hech kim qiziqmayotganini aytib “Hech kim so‘ramayapti. Erim nega o‘ldi, kim o‘ldirdi. Kimga kerak bu qotillik, hech bir rahbar qiziqmayapti. Men esa erimning qotilini topishdan umidvorman”, — degandi.
Izoh (0)