Toshkent viloyati hokimi Zoir Mirzayev Nurafshon shahrida Zulfiya Zokirova nomiga haykal majmuasini qurish va atrofini obodonlashtirish hamda Nurafshon Business City hududida zamonaviy kutubxona binosining qurilishini bekor qilgani haqida xabar berilgan edi. Viloyat hokimligi loyiha bekor qilinmagani, faqat kechiktirilganini ma’lum qildi.
Qayd etilishicha, Toshkent viloyati hokimligi tomonidan joriy moliya yilini samarali yakunlash maqsadida hamda yil yakuniga qadar amalga oshirilishi zarur bo‘lgan muhim tadbirlar ko‘lamini inobatga olib, 2021-yil davomida Toshkent viloyati mahalliy budjeti daromadlarining qo‘shimcha mablag‘lari hisobidan amalga oshiriladigan ishlar uchun ajratilgan mablag‘larning o‘zlashtirilishi tahlil qilingan.
Unga ko‘ra, 2021-yil yakuniga qadar Toshkent viloyati hokimining 23-apreldagi farmoyishiga asosan kameralar uchun, 30-apreldagi farmoyishiga asosan kichik sanoat zonasida ichimlik va oqova suv tarmoqlarini ulash uchun hamda Toshkent viloyati hokimining 3-noyabrdagi “Nurafshon shahrida Zulfiya Zokirova nomiga haykal majmuasi va zamonaviy kutubxona binosini qurish to‘g‘risida”gi farmoyishiga asosan ajratilgan mablag‘larni belgilangan tadbirlar bo‘yicha hisob-kitoblar va loyihalashtirish ishlari yakuniga yetmaganligi sababli o‘zlashtirish imkoni mavjud emasligi aniqlangan.
Budjet kodeksiga asosan moliyaviy majburiyatlarni ro‘yxatdan o‘tkazish joriy moliya yili doirasida amalga oshirilishi belgilanganligidan kelib chiqib, Xalq deputatlari Toshkent viloyati Kengashi bilan kelishilgan holda yuqoridagi tadbirlarga ajratilgan mablag‘lar qisman chegirilgan.
Shuningdek, viloyatda “Obod qishloq” va “Obod mahalla” dasturlari doirasida pudrat tashkilotlari tomonidan bajarilgan ishlar hajmiga nisbatan qarzdorliklar shakllangan bo‘lib, chegirilgan mablag‘lar viloyatda olib borilayotgan va moliyalashtirilishi zarur bo‘lgan boshqa maqsadlar hamda kreditor qarzdorliklarni bartaraf qilishga yo‘naltirilishi belgilangan.
“Yuqoridagilardan xulosa qilish mumkinki, Nurafshon shahrida Zulfiya Zokirova nomiga haykal majmuasi va zamonaviy kutubxona binosini qurish bo‘yicha farmoyish bekor qilinmagan, aksincha, joriy yil moliya yili davomida ajratilgan mablag‘larning ishlatilmagan qismidan samarali foydalanish va boshqa qarzdorliklarni bartaraf etish uchun chegirib olingan. Ushbu obyektga kelgusida aniq hisob-kitoblarga asosan mablag‘ ajratilishi ko‘zda tutiladi”, — deyiladi viloyat hokimligi xabarida.
Eslatib o‘tamiz, Nurafshonda Zulfiya Zokirova nomiga haykal majmuasini qurish va atrofini obodonlashtirish uchun 28,4 milliard so‘m ajratish, shuningdek, Nurafshon Business City hududida zamonaviy kutubxona binosini qurish uchun 6 milliard so‘m ajratish haqidagi farmoyish Toshkent viloyatining sobiq hokimi Davron Hidoyatov tomonidan 3-noyabr kuni imzolangandi.
Viloyat hokimligi ma’lumotida bo‘lajak memorial majmua 2,97 gektar hududda park, o‘yin va piknik maydonlari, amfiteatr, terassali va yopiq turdagi kafelar, favvoralar, tashrif buyuruvchilar uchun qulay o‘rindiqlar va yashil hududlar, piyodalar va velosipedchilar uchun qulay yo‘laklar, bolalar maydonchalarini o‘z ichiga olishi aytilgan.
Zamonaviy 3 qavatli kutubxona 1,1 gektar yer maydonda qurilishi, u funksional zonalar va kompyuter uskunalari bilan jihozlanishi, internet, axborot resurslari va milliy elektron kutubxonadan foydalanish imkoniyati yaratilishi rejalashtirilgan.
Memorial majmuani qurish tashabbusini prezident Shavkat Mirziyoyev 16-oktabr kuni viloyatdagi saylovchilari bilan uchrashuv davomida ko‘plab takliflar qatorida bildirgan.
“Davlat rahbari tashabbusi bilan qurilishi rejalashtirilgan ushbu inshootlar viloyat aholisi, yoshlari va mehmonlari uchun nafaqat maroqli hordiq chiqarish, balki ma’naviy-axloqiy qadriyatlarni yuksaltirish yo‘lida ham muhim qadam bo‘ladi”, — deyiladi hokimlik ma’lumotida.
Toshkent viloyatiga 18-noyabrdan hokimlik qilayotgan Zoir Mirzayev imzolagan 11-dekabrdagi farmoyishda yuqoridagi loyihalar uchun ajratilgan 34 milliard 400 million so‘m mablag‘ viloyat mahalliy budjetiga tiklanishi, ushbu mablag‘dan nogironligi bo‘lgan, kam ta’minlangan, ijtimoiy himoyaga muhtoj fuqarolarning uy-joylarini ta’mirlash uchun viloyat “Saxovat va ko‘mak” jamg‘armasiga o‘tkazib berish maqsadida 1 milliard 650 ming so‘m ajratilishi belgilangandi.
Izoh (0)