Ramzan Qodirov qizini “Checheniston Respublikasi oldidagi xizmatlari uchun” medali bilan taqdirladi

Checheniston rahbari Ramzan Qodirovning qizi, Grozniy shahri maktabgacha ta’lim departamenti boshlig‘i Xadijat Qodirova “Checheniston Respublikasi oldidagi xizmatlari uchun” medali bilan taqdirlandi. Bu haqda Checheniston rahbari administratsiyasi va hukumat vakili Galas Taymasxanov Instagram’da ma’lum qildi, deb yozmoqda Meduza.

“Qadrli og‘am, Checheniston Respublikasi rahbari, Rossiya qahramoni Ramzan Ahmatovich Qodirov topshirig‘iga asosan bugun Grozniy shahri maktabgacha ta’lim departamenti boshlig‘i Xadijat Qodirovaga soha rivojiga qo‘shgan hissasi, o‘zi ishiga sidqidildan yondashganligi uchun mukofot — “Checheniston respublikasi oldidagi xizmatlari uchun” medalini topshirdim”, — deb yozgan chechenistonlik amaldor.

https://www.instagram.com/p/CXTemuqsCOH/?utm_source=ig_embed&ig_rid=37cedbe5-4932-47a5-8ed1-d8e6bf3aaf63

Taymasxanovning so‘zlariga ko‘ra, Xadijat Qodirova lavozimga kirishganidan keyin shahardagi maktabgacha ta’lim tizimida sezilarli ijobiy o‘zgarishlar kuzatilgan.

21 yoshli Xadijat Qodirova 2020-yil dekabr oyida Grozniy maktabgacha ta’lim departamenti boshlig‘i etib tayinlangan. Bunga qadar u Grozniydagi “Skazochniy zamok” (“Sehrli qasr”) nomli bolalar bog‘chasida mudira lavozimida ishlagan.

Ramzan Qodirovning qarindoshlari Chechenistonda boshqa rahbarlik lavozimlarida ham faoliyat olib borishadi. Xususan, uning yana bir qizi Ayshat — respublika madaniyat vaziri, boshqa bir qarindoshi, jiyani Xas-Magomed Qodirov esa Grozniy shahrining meri.

2018-yilda “BBC’ning rus xizmati” Chechenistondagi 158 nafar katta lavozimdagi amaldorlarning 30 foizi respublika rahbariga qarindosh ekanligi, 23 foizi Qodirovning qishloqdoshi, 12 foizi esa uning do‘stlari va ularning qarindoshlari ekanligi haqidagi surishtiruvni e’lon qilgandi.