Ramzan Qodirovning 22 yoshli qizi Checheniston madaniyat vaziri lavozimini egalladi

Checheniston rahbari Ramzan Qodirovning to‘ng‘ich qizi — 22 yoshli Ayshat Qodirova respublika madaniyat vaziri lavozimiga tayinlandi, deb yozadi “RBK”. Bu haqda respublika parlamenti spikeri Magomed Daudov Instagram sahifasida ma’lum qildi.

“Aziz jiyanim Ayshat Ramzanovna Qodirovani Checheniston Respublikasi madaniyat vaziri lavozimiga tayinlangani bilan tabriklayman”, — deb yozdi u.

Daudovning so‘zlariga ko‘ra, madaniyat vaziri o‘rinbosari sifatida Ayshat Qodirova Checheniston madaniy hayotini rivojlantirishga katta hissa qo‘shgan. “Ayshat respublikadagi kutubxonalar, madaniyat uylari va teatrlar rivojlanishiga ulkan hissa qo‘shishga, shuningdek, Checheniston Respublikasi Madaniyat vazirligi faoliyatining barcha yo‘nalishlarida yuqori ko‘rsatkichlarga erishishga muvaffaq bo‘ldi”, — deya aniqlik kiritdi u.

Ramzan Qodirov o‘z qizini Checheniston madaniyat vaziri o‘rinbosari lavozimiga o‘tgan yilning sentabrida tayinlagan edi. Bungacha Ayshat Qodirova bir necha yillar davomida onasi tomonidan asos solingan Firdaws modalar uyini boshqargan. Ushbu tayinlov haqida qaror qabul qilish chog‘ida Qodirov, o‘zining so‘zlariga ko‘ra, respublika madaniyat vaziri rahbari bilan maslahatlashgan edi. “Hali yosh bo‘lishiga qaramay, u, shu jumladan, madaniyat sohasida eng murakkab va katta ko‘lamli loyihalarni boshqarish bo‘yicha boy tajribaga ega”, — degan edi respublika rahbari.

Ta’kidlash joiz, Ayshat Qodirova 2017-yildayoq o‘zining birinchi modalar namoyishini o‘tkazgan va shu yili moda dunyosidagi nufuzli mukofotni qo‘lga kiritgan edi. 2020-yil boshida esa u kutubxona binosida restoran ochib, grozniyliklar g‘azabiga uchragan.

Ramzan Qodirovning yana bir qizi Xadijat Qodirova 2020-yilda 20 yoshida Grozniyda maktabgacha ta’lim boshqarmasi boshlig‘i bo‘lgan edi.