Prezident Shavkat Mirziyoyev boshchiligida o‘tkazilayotgan videoselektor yig‘ilishida yangi ko‘p tarmoqli Endokrinologiya markazida 20 dan ziyod yuqori texnologik amaliyotlar yo‘lga qo‘yilishi ma’lum qilindi. Bu haqda “Daryo” muxbiri xabar qildi.
Bunda gormonal va mineral buzilishlar (osteoporoz), endokrin ginekologiya, reproduktiv, onko, neyro va oftalmoendokrinologiya, nefrologiya, kardiodiabet va intervension xirurgiya kabi yo‘nalishlar tashkil etiladi.
Sog‘liqni saqlash vazirligiga Rossiya va Yevropaning nufuzli tibbiyot tashkilotlarida har yili kamida 50 nafar shifokor malakasini oshirishni ta’minlash vazifasi topshirildi.
Markaz o‘z yo‘nalishida “ilmiy-innovatsion muassasa”ga aylantiriladi, doktorantura kvotalari 2 baravarga oshiriladi.
“Innovatsiya vazirligi yod tanqisligi, ortiqcha vazn, metabolik sindrom, ayollar kasalliklari, bolalar endokrinologiyasi bo‘yicha yangi ilmiy-tadqiqot yo‘nalishlari uchun maqsadli grantlar ajratsin”, – deydi prezident.
Barcha viloyat, tuman va shahar hokimlari berilgan topshiriqlar ijrosini samarali tashkil etib, o‘z hududida endokrinologiya sohasini rivojlantirishga shaxsan mas’ul va javobgar bo‘lishi ta’kidlandi.
Mavzuga doir:
- Shavkat Mirziyoyev: “Har bir hududdagi salomatlik maktablarida mahallalardagi bemorlar, diabetga moyilligi bor, ortiqcha vaznli aholiga kasallikni boshqarish o‘rgatiladi”
- Shavkat Mirziyoyev endokrin kasalliklarining og‘ir oqibatlari, asosan, O‘zbekistonning qaysi hududlari hisobiga to‘g‘ri kelishini aytdi
- “Tumanlarda sharoit va mutaxassislar malakasi yetishmasligi oqibatida, diabetning og‘ir asoratlari bo‘yicha murojaatlar oshgan” – Shavkat Mirziyoyev
Izoh (0)