Endokrin kasalliklarining og‘ir oqibatlari, asosan, Toshkent shahri, Qoraqalpog‘iston, Andijon, Namangan va Toshkent viloyatlariga to‘g‘ri kelmoqda. Bu haqda prezident Shavkat Mirziyoyev boshchiligida o‘tkazilayotgan videoselektor yig‘ilishida aytib o‘tildi, deya xabar bermoqda “Daryo” muxbiri.
Prezident respublikada endokrin kasalliklarini barvaqt aniqlash va davolashga 25 yil davomida e’tibor susayib ketgani, kasalliklarning oldini olish borasida birlamchi bo‘g‘inda hali qilinadigan ishlar ko‘pligini qayd etdi.
So‘nggi besh yilda endokrin kasalliklari 20 foizga ortib, ayniqsa, yoshlar orasida ko‘payayotgani bildirildi.
Shuningdek, davlat rahbari aksariyat hududlar aholisi, ayniqsa, bolalar orasida yod yetishmasligi, oqibatda buqoq kasalligi Qoraqalpog‘iston, Surxondaryo, Buxoro, Qashqadaryo va Toshkent viloyatida yuqoriligicha qolayotganini ta’kidladi.
Ayni sohada bir oy muddatda har bir xavotirli tuman va shahar bo‘yicha bir yillik alohida dastur ishlab chiqilishi aytildi.
Endokrinologiya markazi uchun “eski ToshMI” hududida eng zamonaviy uskunalar bilan jihozlanadigan, 600 o‘rinli yangi bino qurilayotgani ma’lum qilindi va mas’ullarga uni kelgusi yil 1-mayga qadar ishga tushirish bo‘yicha topshiriq berildi.
Izoh (0)