Dunyo va o‘zbek sportiga oid 10-dekabrning eng muhim xabarlari dayjesti bilan tanishing.
O‘zbekiston
Doston Yoqubov — Jahon chempioni
Toshkentda og‘ir atletika bo‘yicha kattalar o‘rtasidagi Jahon chempionati davom etmoqda. 10-dekabr kungi bahslarda -67 kg vazn toifasida O‘zbekiston sharafini himoya qilgan Doston Yoqubov ikki kurash natijasiga ko‘ra 324 kg (144+180) toshni bo‘ysundirib, birinchi o‘rinni qo‘lga kiritdi.
Doston dast ko‘tarishda ikkinchi natijani qayd etgan bo‘lsa, siltab ko‘tarish va ikki kurashda barcha raqiblarini ortda qoldirdi. Shu tariqa u bir yo‘la uchta medalga ega chiqdi.
O‘zbekistonlik hakamlar Saudiya Arabistoni ligasi o‘yinlarini boshqarib boradi
Saudiya Arabistoni chempionatining navbatdagi turida bir qator o‘zbekistonlik hakamlar faoliyat yuritadi. Bu haqida O‘FA matbuot xizmati ma’lum qildi. Tur doirasidagi “Al-Hilol” — “Al-Feyha” uchrashuvida Ilgiz Tantashev bosh hakam vazifasini bajaradi, unga qanotlarda Andrey Sapenko va Timur Gaynulin yordam beradi. Ahrol Risqullayev esa VAR hakami sifatida ishlaydi.
Shuningdek, “Al-Tai” — “An-Nassr” uchrashuvida VAR hakami sifatida Asker Najafaliyev faoliyat olib boradi.
Ma’lumot uchun, o‘zbekistonlik hakamlar Saudiya Arabistoniga VAR seminarida qatnashish uchun yo‘l olgan.
Superliganing noyabr oyidagi eng yaxshilari aniqlandi
“Nasaf” hujumchisi Husayn Norchayev oyning eng yaxshi o‘yinchisi deb e’tirof etildi. Norchayev o‘tgan oydagi 4 ta o‘yinda uchta gol urgandi.
Eng yaxshi murabbiy nomiga “Bunyodkor” bilan uchta o‘yinda uchta g‘alaba qayd etgan Shuhrat Maqsudov loyiq ko‘rildi. “Andijon” futbolchisi Muhammadkarim Toirovning “OKMK” darvozasiga kiritgan to‘pi oyning eng chiroyli goli deb topildi.
Jahon
Yevrokuboklarda 6-turning eng yaxshilari aniqlandi
Chempionlar Ligasida haftaning eng yaxshi o‘yinchisi sifatida Kilian Mbappe tanlandi. “PSJ” forvardi “Bryugge”ga qarshi bahsda (4:1) dubl va golli uzatma muallifiga aylangandi.
“Napoli” yarim himoyachisi Elif Elmaz Yevropa Ligasida hafta qahramoni bo‘ldi. Futbolchi “Lester”ga qarshi o‘yinda (3:2) ikkita gol urgandi. “Bazel” vakili Artur Kabral esa Konferensiyalar Ligasida turning eng yaxshi o‘yinchisi deb topildi. Kabral “Qorabog‘”ga qarshi uchrashuvda (3:0) dubl muallifi bo‘lgandi.
Chempionlar Ligasida hafta ramziy terma jamoasi
Darvozabon: Odisseas Vlahodimos (“Benfika”);
Himoyachilar: Alfonso Devis (“Bavariya”), Niko Shults (“Borussiya D”), Jilberto (“Benfika”);
Yarim himoyachilar: Mahmud Doud, Marko Roys (ikkisi – “Borussiya D”), Leroy Sane (“Bavariya”), Arno Danjuma (“Vilyarreal”);
Hujumchilar: Timo Verner (“Chelsi”), Kilian Mbappe, Lionel Messi (ikkisi – “PSJ”).
Premyer Ligada noyabr oyining eng yaxshilari e’lon qilindi
“Manchester Siti” ustozi Xosep Gvardiola noyabr oyining eng yaxshi murabbiyi nomiga loyiq ko‘rildi. “Shaharliklar” o‘tgan oydagi uchta o‘yinda uchta g‘alaba qayd etgandi. Sovrinni o‘ninchi marta qo‘lga kiritgan Gvardiola bu borada Devid Moyesga yetib oldi. Faqat Arsen Venger (15) va Aleks Fergyuson (27) undan oldinda.
Eng yaxshi o‘yinchi sifatida “Liverpul” himoyachisi Trent Aleksander-Arnold e’tirof etildi. Trent noyabrdagi uchta uchrashuvda bitta gol urdi va to‘rtta golli uzatma amalga oshirdi.
“Barselona”ning yana bir yetakchisi safdan chiqdi
Katalonlar hujumchisi Memfis Depay “Bavariya”ga qarshi o‘yinda mushak jarohatini orttirib olgandi. AS xabariga ko‘ra, niderlandiyalik futbolchi kamida bir oyga safdan chiqqan.
Shu tariqa “Barselona” birgina hujumchi qolmoqda — Lyuk de Yong. Depaydan tashqari Martin Breytueyt va Ansu Fati jarohat tufayli, Serxio Aguero esa yuragidagi muammo sabab lazaretda bo‘lib turibdi.
Diario Sport’ning xabar qilishicha, Ansu Fati o‘zini yaxshi his qilmoqda. Biroq “Barsa” tavakkal qilmoqchi emas va 19 yoshli futbolchining qaytishini 2-yanvar sanasiga qoldirgan. Shu tariqa, Fati katalonlarning to‘rtta o‘yinini o‘tkazib yuboradi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)