30 yoshli Messias “Milan”ning qutqaruvchisiga aylanmoqda. Bir necha yil avval qora ishchi bo‘lgan futbolchi bu darajaga qanday erishdi?

27 yoshida professional futbolga kirib kelgan Junior Messias so‘nggi vaqtlarda “Milan”da asosiy rollardan birini bajarmoqda. Messias Chempionlar Ligasida gol urdi, undan so‘ng A Seriyada “Jenoa” darvozasini ikki bor ishg‘ol qildi.

“Milan” 2021-yilning yozidagi transfer oynasini samarali yakunladi: jamoaga Temue Bakayoko (“Chelsi”dan ijara), Pyetro Pellegri (“Monako”dan ijara) va Yassin Adli (“Bordo”dan xarid qilindi va darhol jamoaning o‘ziga ijaraga berildi).

Italiyaliklar hujum chizig‘i uchun ijodkor futbolchi qidirdi. Asosiy nomzod “Brest” futbolchisi Romen Fevr bo‘lib turgandi, ammo transfer amalga oshmadi. Shundan so‘ng “Milan” Aleksey Miranchuk borasida “Atalanta” bilan bog‘landi, muzokaralar ijobiy boshlanmadi, uni davom ettirishga esa vaqt yo‘q edi.

“Milan” B Seriyaga e’tiborini qaratdi. “Krotone” jamoasi hujumchisi Junior Messias xarid qilindi.

Braziliyalik tibbiy ko‘rikdan o‘tdi va klub bilan shartnoma imzoladi. Futbolchi 5,4 million yevroga sotib olish huquqi bilan 2,6 million yevroga ijara asosida jamoaga keldi.

2020/21-yilgi mavsumda Junior Messias “Krotone” safida ilk bor A Seriyada o‘ynagandi. Yuqori divizionda braziliyalik futbolchi yo‘qolib qolmadi — 4-turda “Yuventus”ga qarshi bahsda Messias o‘yinning eng yaxshi futbolchisi bo‘ldi. Mavsum davomida hujumchi A Seriyada 9 ta gol urdi va 4 ta golli uzatmaga mualliflik qildi. U yaxshi futbolchiga aylandi, lekin havaskorlarga xos beg‘uborlikni yo‘qotmadi. Italiya chempionatidagi o‘yinlarning birida Messiasning futbolkasi yirtilib ketadi. Boshqa futbolchilar darhol futbolkasini almashtirgani yuguradi, ammo Junior mato osilib qolmasligi uchun uni tugun qilib bog‘ladi va Italiya chempionati emas, maktab birinchiligi musobaqasi o‘tkazilayotgandek o‘ynashda davom etdi.

Junior bo‘yi ikki metr keladigan nigeriyalik hujumchi Simi bilan birgalikda “Krotone” urgan gollarning yarmidan ko‘piga mualliflik qildi (45 tadan 29 tasi ikki hujumchiga tegishli).

Ikkala hujumchi ham yangi mavsumda A Seriyada qoldi (“Krotone” B Seriyaga tushib ketgan bo‘lsa ham): Nvankvo “Salernitana”da, Messias esa “Milan”da.

Juniorning ajralib turadigan xislati — yaxshi texnika. Ko‘chadagi o‘yinlari sabab driblingchiga aylanganini o‘zi ham tan oladi.

Dribling — Braziliyadan, ko‘chadan o‘rganilgan. Men professional jamoalarning akademiyasida shug‘ullanmaganman, shunchaki do‘stlarim bilan vaqt o‘tkazardim. Biz erkin edik — har kim o‘zi xohlagan narsasini qilardi. Shuning uchun fintlar faqatgina samarali emas, foydali ham bo‘lishi kerak, deb hisoblardik. Futbolning ma’nosi — g‘alaba. Zidanni eslayman, uning o‘yin uslubi menga juda yoqardi. U xotirjam, samarali va chiroyli harakat qilardi! Hozirgi futbol — bu taktika, yorqin futbolchilar yetishmaydi. Futbol yanada jozibaliroq bo‘lishini istardim.

Junior Messias

Messiasning mahoratidan ko‘ra uning bosib o‘tgan yo‘li qiziqroq. Messias “Kruzeyros” akademiyasida futbolni o‘rgana boshlaydi. Ammo asosiy jamoaga o‘tish unga nasib etmaydi. 20 yoshida braziliyalik futbolchi oilasini boqish uchun Italiyaga yo‘l oladi. Akasi undan avvalroq Yevropaga borgan edi.

Messias Turin chekkasidagi Barreira di Milano nomli kvartalga joylashdi. Qurilish maydonchasidan ish topib, arzimas pulga vayron bo‘lgan binolardan qolgan g‘ishtlarni tozalardi va maydalardi. Futbol uning xobbisi sifatida qolib ketdi. Keyin esa quruvchi bo‘lib ishladi, undan so‘ng maishiy texnika savdosi bilan shug‘ullanadigan kompaniyaga ishga kirdi, u yerda yuk tashuvchi va kuryerlik vazifalarini bajardi.

Dam olish kunlarida immigrantlardan tashkil topgan “Sport Varik” havaskorlar jamoasida to‘p surardi. Bosh murabbiy Etsio Rossi jamoaning rivojlanishiga yordam berdi. Keyinchalik mutaxassis “Kazale” jamoasidan taklif oladi va u Messiasni o‘zi bilan birga olib ketadi. Murabbiy futbolchi tanlashda adashmagan edi: Junior 32 o‘yinda 21 ta gol urib, jamoasining D Seriyaga qadar chiqishiga yordam berdi. Shu tariqa braziliyalikning Italiya futbolidagi parvozi boshlandi. Juniorni jamoadoshlari Figura (ispanchada “yulduz” degan ma’noni bildiradi) deb atardi.

Messias Italiya fuqaroligini olish uchun harakat qilardi, taxminan o‘sha vaqtlarda Juniorni professional klublar payqay boshladi. Hujumchi 25 yoshida D Seriya, 27 yoshida C Seriya, 28 yoshida B Seriyada o‘ynadi. 29 yoshida “Krotone” bilan birgalikda A Seriyaga chiqdi. 30 yoshida esa “Milan”da paydo bo‘ldi.

Mening hikoyam nimani o‘rgatadi? Ishonch doim kerakligini. Albatta, omad ham kerak, lekin mehnatsiz hech narsaga erishib bo‘lmaydi. Hech qachon o‘zimni kuchli o‘yinchi deb hisoblamaganman. Undan tashqari boshqalardan ham yomonroq ekanimga amin edim. Shuning uchun ko‘proq shug‘ullanardim.

Junior Messias