FIFA fransiyalik futbolchi bilan bog‘liq vaziyat tufayli “Nasaf”ga taqiq qo‘ydi. U qarshiliklar safida bitta ham o‘yin o‘tkazmagan

FIFA “Nasaf” jamoasiga taqiq qo‘ydi. Bu haqda PFL matbuot xizmati ma’lum qildi.

2021-yilning 7-oktabrida FIFA Nizolarni hal etish palatasi “Nasaf” klubi va fransiyalik futbolchi Abdelaye Diakite o‘rtasidagi nizoli vaziyat yuzasidan qaror chiqargandi. Unga ko‘ra, “Nasaf” futbolchi bilan tuzilgan shartnoma shartlarini bajarmagan.

Shu sababli futbolchi FIFAga murojaat qilgan va yakunda tashkilot belgilangan qarzdorlik va jarima to‘lovlarini 45 kun mobaynida to‘lash majburiyatini “Nasaf” klubi zimmasiga yuklagan edi. Agar Qarshi jamoasi ushbu majburiyat o‘z vaqtida bajarilmasa, klubga nisbatan milliy va xalqaro miqyosda yangi futbolchilarni ro‘yxatdan o‘tkazish bo‘yicha taqiq qo‘yilishi haqida ogohlantirilgan.

2021-yil 9-dekabrda “Nasaf”ga berilgan muddat o‘z yakuniga yetdi va jamoaga transfer taqiqi qo‘yildi. Endi klub qishki transfer oynasida yangi futbolchilarni xarid qilishi uchun mazkur nizoli vaziyatni hal etishi lozim bo‘ladi.

2020-yil fevral oyida qarshiliklar matbuot xizmati Diakitening jamoa o‘quv-yig‘in mashg‘ulotlarida qatnashayotgani haqida ma’lumot bergandi. Fransuz “Nasaf” jamoasi tarkibida birorta o‘yinda maydonga tushmagan.