AQSh va Avstraliya ortidan Britaniya ham Pekinda o‘tkaziladigan Olimpiada o‘yinlariga diplomatik boykot e’lon qildi

Buyuk Britaniya Xitoy poytaxti Pekinda 2022-yilning fevralida bo‘lib o‘tadigan Olimpiada o‘yinlariga diplomatik boykot e’lon qildi. Bu haqda mamlakat bosh vaziri Boris Jonsonga tayanib, Meduza xabar berdi.

Jonsonning so‘zlariga ko‘ra, na Britaniya hukumati vazirlari, na birorta rasmiy shaxs Olimpiada o‘yinlarga boradi. Shu bilan birga, bosh vazir Britaniya hukumati sport boykotini e’lon qilishga qarshi ekanini, chunki bu “mantiqqa to‘g‘ri kelmasligini” ta’kidladi.

Ma’lumot uchun, diplomatik boykot rasmiy delegatsiyalarning Olimpiadaga borishdan bosh tortishini anglatadi. Ushbu cheklovlar sportchilarga ta’sir qilmaydi.

6-dekabr kuni AQSh, 8-dekabr kuni Avstraliya Olimpiada o‘yinlariga diplomatik boykot e’lon qilgandi. Ushbu davlatlar hukumati o‘z harakatlarini Xitoyning Shinjon avtonom hududidagi uyg‘urlarga nisbatan ta’qiblari bilan bog‘lagan.

“Bayden ma’muriyati 2022-yilda Pekinda bo‘lib o‘tadigan qishki Olimpiada va Paralimpiya o‘yinlariga diplomatik yoki rasmiy vakillarini yubormaydi”, — dedi Oq uy matbuot kotibi Jen Psaki va sportchilarga cheklovlar qo‘yilmasligini ta’kidladi.

Boykot e’lon qilish qarori Vashington nazdida Xitoy inson huquqlarini poymol qilayotgani, jumladan, Shinjondagi uyg‘urlarga qarshi genotsidni davom ettirayotgani uchun qabul qilindi, deyiladi Oq uy bayonotida.

Psakining fikricha, hozirgi vaziyat 1980-yillardagi voqealarni takrorlashdan iborat emas. O‘shanda AQSh va boshqa o‘nlab davlatlar, jumladan, Xitoy ham Sovet qo‘shinlarining Afg‘onistonga kiritilishi sababli Moskvadagi yozgi Olimpiada o‘yinlariga butunlay boykot e’lon qilgandi.

Xalqaro Olimpiada qo‘mitasi AQShning qarorini “hurmat qilishini” bildirdi. Xitoyning AQShdagi elchixonasi esa Vashington qarorini “siyosiy manipulyatsiya” deb atadi.

“Amerika siyosatchilariga hech qanday taklif berilmagan, shuning uchun bu “diplomatik boykot” yo‘q joydan paydo bo‘lgan. Bunday balanparvoz harakat shunchaki siyosiy manipulyatsiya va Olimpiya Xartiyasi ruhini obdon tushirishdir”, — dedi Xitoy elchixonasi vakili.

Keyinroq Avstraliya bosh vazir Skott Morrison mamlakat AQShning diplomatik boykotiga qo‘shilishini ma’lum qildi.

Uning so‘zlariga ko‘ra, so‘nggi yillarda Avstraliyaning Xitoy bilan ikki tomonlama munosabatlari sezilarli darajada yomonlashgan. Bunga sabablar qatorida Morrison Shinjon-Uyg‘ur avtonom hududida inson huquqlari buzilishi davom etayotgani, shuningdek, XXR Avstraliyaning mudofaa rejalariga, xususan, yadroviy suvosti kemalari bilan qurollanish niyatiga tanqidiy munosabatda ekanini tilga olgan.

XXIV qishki Olimpiada o‘yinlari Pekinda 2022-yilning 4—20-fevral kunlari bo‘lib o‘tadi. 4—13-mart kunlari Xitoy poytaxti Paralimpiya o‘yinlariga mezbonlik qiladi.