Xitoyning FHT Future Technology kompaniyasi Farg‘ona viloyatida 25 gektar maydonda innovatsion texnopark va 350 million dollarlik investitsiya hisobiga 500 gektar maydonda quyosh fotoelektr stansiyasi qurishni rejalashtirmoqda. Bu haqda Farg‘ona viloyati hokimligi xabar qildi.
Ma’lum qilinishicha, viloyat hokimi Xayrullo Bozorov Xitoy kompaniyasi vakillari Li Venjin va Chen Xingyang hamda kompaniyaning O‘zbekistondagi hamkorlaridan iborat investorlar guruhini qabul qilgan. Kompaniya ijrochi direktori Li Venjin yirik investitsion loyiha haqida ma’lumot bergan.
Loyihaga ko‘ra, ishlab chiqarilgan elektr energiyasini texnoparkda joylashtiriladigan xorijiy korxonalarni ta’minlashga yo‘naltirish ko‘zda tutilgan. Texnoparkda zamonaviy innovatsion texnologiyalarga asoslangan mahsulotlar, shu jumladan, dasturiy mahsulotlar va axborot texnologiyalari ishlab chiqarish maqsad qilingan. Shuningdek, yuqori sifatli sement ishlab chiqarish loyihasi ham o‘rin olgan.
Qayd etilishicha, Xayrulla Bozorov loyihaning har bir bandi bo‘yicha hamkorlikda ish olib borish yuzasidan investor vakillar va viloyat mutasaddilaridan iborat ishchi guruh tuzish taklifini bildirgan. Bundan tashqari, cho‘l zonalardagi qum va toshloq, suvsiz yerlarda loyihani amalga oshirish imkoniyatlarini o‘rganish bo‘yicha ko‘rsatma berilgan.
“Hamkorlikda muzokaralarni davom ettirish bo‘yicha kelishib olindi”, — deyiladi xabarda.
Mavzuga doir:
- O‘zbekistonda 3 ta quyosh elektr stansiyasini qurish uchun 15 ta xalqaro kompaniya qiziqish bildirdi
- Xorazm, Buxoro, Qashqadaryo, Namangan va Farg‘onada jami 900 megavattli 5 ta quyosh elektr stansiyasi barpo etiladi
- Navoiyda ilk bor xususiy investor tomonidan qurilgan quyosh fotoelektr stansiyasi ishga tushirilmoqda
Izoh (0)