Nasafnews nashri Qarshi shahri “Shodlik” mahallasida joylashgan 2-sonli yotoqxona xarob ahvolda ekani, viloyat va shahar hokimligi holatga e’tibor qaratmayotgani haqida xabar berdi. Viloyat hokimligi holatga munosabat bildirdi.
Ma’lum qilinishicha, mazkur bino 2019-yil 3-maydagi oldi-sotdi shartnomasiga asosan tadbirkor Anvar Jovliyev tomonidan sotib olingan. Ya’ni, bino hozirda yotoqxona emas, qonuniy tadbirkorning xususiy mulki hisoblanadi. Binoda jami 120 ta xona mavjud bo‘lib, shundan 18 tasi yordamchi xonalar (oshxona, yuvinish xonasi, omborxona), 102 tasi yashashga mo‘ljallangan xonalardan iborat. O‘rganishlar jarayonida bugungi kunda 64 ta xonada fuqarolar noqonuniy yashab kelayotgani, turli hududlardan kelib, o‘zboshimchalik bilan yotoqxonaga joylashib olgani, tadbirkor bir necha bor ogohlantirishiga qaramasdan, xonalardan chiqmagani aniqlangan. Tadbirkor A. Jovliyev insoniylik jihatidan ularning yashashiga ruxsat berishga majbur bo‘lgan.
Qayd etilishicha, hozirda yotoqxona va uning atrofida tozalash, obodonlashtirish ishlari olib borilib, tartibga keltirilgan.
Ta’kidlanishicha, binodagi ko‘pchilik fuqarolarning o‘z yashash hududlarida uy-joylari mavjud.
“Tez kunlarda kim uy-joyga muhtoj, kimning uy-joyi borligi o‘rganilib, har biri bo‘yicha oxirgi xulosalar beriladi. Shunga qarab binoda yashab kelayotgan uy-joyi bo‘lmagan fuqarolarni kelgusida turar joylar bilan ta’minlash choralari ko‘riladi. Tumanlardan kelib binoga joylashib olgan fuqarolar avvalgi yashash manzillariga qaytariladi. Barcha fuqarolar muammosi tegishli tartibda hal etilganidan so‘ng bino tadbirkorga bo‘shatib beriladi”, — qayd etiladi xabarda.
Izoh (0)