Sudan armiyasining generali Abdul Fattoh al-Burhon 2023-yilga rejalashtirilgan prezidentlik saylovlarida ishtirok etmasligini ma’lum qildi. Bu haqda Al Arabiya telekanliga tayanib, “TASS” xabar berdi.
“Men prezidentlik saylovida ishtirok etmayman, hatto buni mendan so‘rashsa ham. Mening xalq va armiya oldida aniq missiyam bor bo‘lib, u mamlakatda o‘tish davrining yakunlanishidan iborat… Biz biror bir siyosiy kuchlarni o‘zgartirishni emas, aksincha, barcha uchun joy ajratishni istaymiz”, — deydi Sudan Suveren kengashi rahbari al-Burhon.
21-noyabr kuni al-Burhon va harbiylar tomonidan hokimiyatdan chetlashtirilgan bosh vazir Abdulla Xamdok yangi siyosiy kelishuvni imzolagan edi. Hujjatga ko‘ra, Xamdok hukumatni qayta boshqaradi va yangi texnokratlarning yangi vazirlar kabinetini shakllantirishga kirishadi.
Generalning so‘zlariga ko‘ra, Vazirlar Mahkamasining rahbari “o‘z yordamchilarini tanlashda to‘liq erkinlikka ega va qaror qabul qilishda mustaqil bo‘ladi”— harbiylar esa bundan manfaatdor. “So‘nggi siyosiy kelishuv mamlakatdagi o‘tish davrining haqiqiy startiga aylandi”, — deydi al-Burhon.
Sudan shaharlarining ko‘chalarida o‘tkazilgan namoyishlar oqibaitda ko‘plab insonlar qurbon bo‘lgani to‘g‘risdagi xabarlarga izoh berar ekan, armiya qo‘mondoni bunda kimnidir ayblash to‘g‘ri bo‘lmasligini aytgan. “Biz norozilik namoyishchilarining o‘ldirishida aybdorlarni aniqlash bo‘yicha sud organlari bilan ishlayapmiz. Tergov natijalarini kutmoqdamiz. Aybdorlar shubhasiz jazoga tortiladi”, — deya qo‘shimcha qilgan u.
Eslatib o‘tamiz, Sudan harbiylari 25-oktabrga o‘tar kechasi mamlakat muvaqqat hukumatining bir qator vazirlarini, jumladan, muvaqqat bosh vazir Abdulla Xamdokni hibsga olgandi. Xamdok hamda uning rafiqasiga 27-oktabr — hibsga olinganidan bir kun o‘tib uyiga qaytishga ruxsat berilgan edi.
Izoh (0)