Германия ҳукумати веб-сайтида Ангела Меркелнинг канцлер вазифасини бажарувчи сифатида сўнгги бор йўллаган ҳафталик видеомурожаати эълон қилинди. Бу ҳақда Meduza хабар берди.
Меркелнинг айтишича, у Германия ҳукуматидаги 15 йиллик бошқаруви давомида турли мавзуларда 600 дан ортиқ видеомурожаатлар йўллаган. Ўзининг сўнгги мурожаатида у Германия аҳолисини коронавирусга қарши фаол эмланишга чақирди.
«Вакцина олинг! Биринчи марта эмланасизми ёки бустер доза оласизми, фарқи йўқ», — дея Меркель исталган вакцина ёрдам беришини таъкидлади. У эмланиш ҳеч бўлмаганда коронавирусдан ўлишнинг олдини олишини айтди. Меркелнинг сўзларига кўра, хавфлироқ дея тахмин қилинаётган янги «омикрон» штамми Германияда ҳам аниқланган вазиятда эмланиш айниқса муҳимдир. Меркель вакцинациянинг максимал даражаси мамлакатда пандемияни енгишга ёрдам беришини таъкидлади.
«Афсуски, олдимизда ҳали бир неча оғир ҳафталар турибди, уларни фақат биргаликдаги саъй-ҳаракатлар билан енгиб ўтишимиз мумкин», — деди канцлер вазифасини бажарувчи.
Октябрь ойидан бери Германияда коронавируснинг янги тўлқини давом этмоқда. Унинг оқибатида касалланишлар сони бўйича янги антирекордлар қайд этилмоқда. Аммо мамлакатда инфекция қурбонлари сони бир йил олдингига қараганда анча кам.
Ангела Меркель уч йил аввал 2021 йилда Германия канцлери лавозимини тарк этишини эълон қилган эди. Сентябрь ойида мамлакатда сайловлар бўлиб ўтди, унинг натижасида янги ҳукумат коалицияси тузилди.
Канцлер сифатида Меркелнинг ўрнини Германиянинг амалдаги молия вазири Олаф Шольц эгаллайди. Парламентда у 8 декабрь куни расман иш бошлайди.
2 декабрь куни Берлинда Ангела Меркелнинг Германия канцлери лавозимидан кетиши муносабати билан тантанали маросим бўлиб ўтган эди.
Изоҳ (0)