Toshkentda narkolaboratoriya faoliyatiga chek qo‘yildi. Jinoiy guruh a’zolarining uch nafari — talabalar

DXX xodimlari tomonidan o‘tkazilgan maxsus operatsiya natijasida internet tarmog‘i orqali sintetik narkotik moddalar savdosi bilan shug‘ullanuvchi uyushgan jinoiy guruh faoliyatiga chek qo‘yildi, deb xabar beradi O‘zA.

Ma’lum qilinishicha, ushbu shaxslar tomonidan Toshkent shahrida ijaraga olingan 3 ta xonadonda “Mefedron” sintetik narkotik moddasini yashirin laboratoriya sharoitida ishlab chiqarish yo‘lga qo‘yilgan.

Maxsus tadbirlar natijasida ushbu xonadonlarda umumiy miqdorda 892 gramm “Mefedron”, 45 gramm “Alfa-PVP” sintetik narkotik moddalari, xomashyo sifatida foydalaniladigan 360 litrdan ortiq zaharli kimyoviy moddalar va prekursorlar hamda zarur asbob-uskunalar, himoya vositalari borligi aniqlanib, protsessual tartibda rasmiylashtirib olingan.

Shuningdek, guruh a’zolari tomonidan xufiya joylarga yashirib qo‘yilgan 898 gramm “Mefedron” moddasi, 15 litr va 12 kilogramm miqdorida turli xil kimyoviy moddalar hamda 8 litr “Bromketon” olib qo‘yilgan.

Bundan tashqari, ulardan noqonuniy yo‘llar bilan bitkoin kriptovalyutasida jamg‘arilgan 113 770 AQSh dollari ham musodara qilingan.

“Ta’kidlash lozimki, 1992—2000-yillar oralig‘ida tug‘ilgan guruh a’zolarining 3 nafari Toshkent shahridagi hamda xorijdagi nufuzli oliy o‘quv yurtlari talabalari hisoblanadi”, — deyiladi xabarda.

Shuningdek, ta’kidlanishicha, narkokuryerlar tomonidan sintetik giyohvand moddalarni mamlakatimizga xorijiy davlatlardan olib kelinishi ham kuzatilmoqda.

Xususan, yuk avtomashinasida chet eldan keltirilgan elektrosamokat ichiga yashirib qo‘yilgan 2 kilogrammga yaqin “Mefedron” va 499 gramm “Spays” moddalarini hamda 6 dona gashish moyi kapsulasini qabul qilib olgan vaqtida Toshkent shahrida yashovchi, muqaddam sudlangan shaxs (1996-yilda tug‘ilgan) qo‘lga olingan.

Shuningdek, 36 yoshli fuqaro ham xorijdan yuk avtomashinasida olib kelingan elektrosamokat ichiga yashirib qo‘yilgan 500 gramm geroin, 947 gramm gashish, 500 dona LSD nomli sintetik narkotik modda hamda 60 dona gashish moyi kapsulasini qabul qilib olgan vaqtida ushlangan.

Aniqlanishicha, mazkur shaxslar Toshkent shahrida internet tarmog‘i orqali narkotik moddalarni sotish bilan shug‘ullanuvchi jinoiy guruhning faol a’zolari hisoblanadi.

Hozirda mazkur holatlar yuzasidan jinoyat ishlari qo‘zg‘atilib, tergov harakatlari olib borilmoqda.

Avvalroq DXX Namangan, Farg‘ona va Toshkent viloyatlarida 2,4 mlrd so‘mlik noqonuniy tovarlar kontrabandasiga chek qo‘ygani, Toshkent viloyatida 4 kg giyohvand modda saqlayotgan erkak aniqlangani, IIB xodimiga ishni yopish uchun pora bergan o‘g‘li esa qo‘lga olingani to‘g‘risida xabar berilgandi.