Rossiyaning Smartavia aviakompaniyasi Namanganga ilk muntazam parvozini amalga oshirdi. Bu haqda “Daryo” muxbiri Azizbek Abduvaliyev xabar bermoqda.
Aviakompaniya Boeing-737 rusumli havo kemasida 2-dekabr kuni tongda 137 nafar yo‘lovchini Sankt-Peterburgdan Namanganga olib keldi.
Oradan 1,5 soat o‘tib 169 nafar yo‘lovchi shu samolyotning o‘zida Namangandan Sankt-Peterburgga uchib ketdi.
Smartavia Rossiyadagi yirik aviakompaniyalardan biri bo‘lib, 15 ta havo kemasiga ega, Rossiya va xorijdagi 60 dan ortiq aeroportga parvoz qiladi.
Kompaniya bugunga qadar Sankt-Peterburg—Namangan—Sankt-Peterburg yo‘nalishidagi faqat charter reyslarini amalga oshirib kelardi. Endi Smartavia haftaning har payshanba kuni ushbu yo‘nalishda doimiy parvozlarni yo‘lga qo‘ydi.
Namangan xalqaro aeroporti mutasaddilarining ma’lum qilishicha, 2021/2022-qish mavsumi parvozlar jadvaliga muvofiq Rossiyaning S7 Airlines va Ural Airlines aviakompaniyalari Namanganga muntazam parvozlarni bajarishi mumkin edi. Bugundan ularning qatoriga Smartavia ham qo‘shildi.
Izoh (0)