Shotlandiyada Buyuk Britaniyadan ajralib chiqish bo‘yicha ikkinchi referendum o‘tkazish rejalashtirilmoqda. Bu haqda Herald Scotland’ga tayanib, Tengrinews xabar berdi.
Shotlandiya rahbari va amaldagi birinchi vazir Nikola Sterjen 2022-yilda Buyuk Britaniyadan mustaqil bo‘lish uchun yana referendum o‘tkazish tashabbusi bilan chiqmoqchiligini aytdi. Referendumning o‘zini 2023-yilda o‘tkazish rejalashtirilgan.
“Keyingi yil davomida men 2023-yil oxirigacha referendum o‘tkazish uchun zarur bo‘lgan jarayonni boshlayman”, — dedi Sterjen va uning partiyasi Shotlandiya mustaqilligi uchun yangi dalillar keltirishini ta’kidladi.
Shotlandiyada avvalgi referendum 2014-yilda o‘tkazilgan, o‘shanda shotlandlarning 55 foizi mustaqillikka qarshi chiqqan edi. Biroq Buyuk Britaniya Yevropa Ittifoqidan ajralib chiqqanidan keyin jamoatchilikning fikri biroz o‘zgardi. Xususan, shotlandlarning 62 foizi Yevropa Ittifoqida qolish uchun ovoz bergandi. Endi Sterjenning ta’kidlashicha, Shotlandiya o‘z xohishiga zid ravishda Yevropa Ittifoqidan chiqarilgan.
Shuningdek, referendum o‘tkazishni Britaniya bosh vaziri Boris Jonson ma’qullashi kerak, biroq u bunday qilmasligi haqida bir necha bor ta’kidlagan. Ammo bu Shotlandiya hukumati tomonidan Britaniya hukumatiga qarshi qonuniy choralar ko‘rilishiga olib kelishi mumkin.
Eslatib o‘tamiz, Shotlandiyada 2021-yil may oyida bo‘lib o‘tgan parlament saylovlarida Buyuk Britaniyadan ajralib chiqish tarafdori bo‘lgan partiyalar g‘alaba qozongan edi. Mamlakat hozir Buyuk Britaniya tarkibiga kiradi, bir vaqtlar u mustaqil davlat bo‘lgan.
Avvalroq Ipsos MORI o‘tkazgan so‘rovnomada shotlandlarning deyarli 58 foizi mintaqa mustaqilligi uchun ovoz berishini aytgan.
Mavzuga doir:
Izoh (0)