Ukraina prezidenti Vladimir Zelenskiy mamlakat Xavfsizlik xizmati kontrrazvedka departamenti boshlig‘i Aleksandr Rusnakni lavozimidan olib tashladi. Amaldorning ishdan olinishi to‘g‘risidagi farmon Ukraina prezidentining saytida e’lon qilingan bo‘lib, uning bo‘shatilishiga nima sabab bo‘lgani ko‘rsatilmagan. Rusnak 2019-yilning sentabridan buyon ushbu lavozimda ishlab kelayotgandi, deb xabar beradi “Kommersant”.
“Rusnak Aleksand Vasilyevich Ukraina xavfsizlik xizmati kontrrazvedka departamenti boshlig‘i lavozimidan bo‘shatilsin”, — deyiladi hujjatda.
Farmon Ukraina xavfsizlik xizmati bir guruh Ukraina va Rossiya fuqarolari mamlakatda hokimiyatni egallashga tayyorgarlik ko‘rayotgani bo‘yicha tergov faktini ma’lum qilgan kunda imzolangan. 26-noyabr kuni Kiyevda o‘tkazilgan press-marafonda Zelenskiy o‘zida davlat to‘tarishini rejalashtirayotganlar haqida ma’lumot borligini, biroq uning haqiqatligiga ishonmasligini ma’lum qilgan.
Ukraina rahbarining so‘zlariga ko‘ra, unda razvedka ma’lumotlari, jumladan, “Rossiya vakillari bilan ukrainalik ishbilarmon Rinat Axmetovning Ukrainadagi milliard dollar jalb etadigan davlat to‘ntarishida ishtirok etishni muhokama qilayotgani” tushirilgan audioyozuvlar mavjud.
Zelenskiyning fikricha, Axmetov shu tariqa “Ukraina davlatiga qarshi urushga tortilmoqda”. Davlat rahbari uni suhbat uchun ofisiga taklif qilgan.
Rossiya prezidenti matbuot kotibi Dmitriy Peskov Zelenskiyning Moskva Ukrainadagi davlat to‘ntarishini rejalashtirishga aloqadorligi haqidagi so‘zlariga izoh berar ekan, Rossiya “hech qachon bunday masalalar bilan shug‘ullanmasligini” aytgan.
Izoh (0)