Шотландияда Буюк Британиядан ажралиб чиқиш бўйича иккинчи референдум ўтказиш режалаштирилмоқда. Бу ҳақда Herald Scotland’га таяниб, Tengrinews хабар берди.
Шотландия раҳбари ва амалдаги биринчи вазир Никола Стержен 2022 йилда Буюк Британиядан мустақил бўлиш учун яна референдум ўтказиш ташаббуси билан чиқмоқчилигини айтди. Референдумнинг ўзини 2023 йилда ўтказиш режалаштирилган.
«Кейинги йил давомида мен 2023 йил охиригача референдум ўтказиш учун зарур бўлган жараённи бошлайман», — деди Стержен ва унинг партияси Шотландия мустақиллиги учун янги далиллар келтиришини таъкидлади.
Шотландияда аввалги референдум 2014 йилда ўтказилган, ўшанда шотландларнинг 55 фоизи мустақилликка қарши чиққан эди. Бироқ Буюк Британия Европа Иттифоқидан ажралиб чиққанидан кейин жамоатчиликнинг фикри бироз ўзгарди. Хусусан, шотландларнинг 62 фоизи Европа Иттифоқида қолиш учун овоз берганди. Энди Стерженнинг таъкидлашича, Шотландия ўз хоҳишига зид равишда Европа Иттифоқидан чиқарилган.
Шунингдек, референдум ўтказишни Британия бош вазири Борис Жонсон маъқуллаши керак, бироқ у бундай қилмаслиги ҳақида бир неча бор таъкидлаган. Аммо бу Шотландия ҳукумати томонидан Британия ҳукуматига қарши қонуний чоралар кўрилишига олиб келиши мумкин.
Эслатиб ўтамиз, Шотландияда 2021 йил май ойида бўлиб ўтган парламент сайловларида Буюк Британиядан ажралиб чиқиш тарафдори бўлган партиялар ғалаба қозонган эди. Мамлакат ҳозир Буюк Британия таркибига киради, бир вақтлар у мустақил давлат бўлган.
Аввалроқ Ipsos МОRI ўтказган сўровномада шотландларнинг деярли 58 фоизи минтақа мустақиллиги учун овоз беришини айтган.
Изоҳ (0)