UzAutoMotors 2021-yilning noyabr—dekabr oylarida avtomobili yetkazib berilishini kutayotgan xaridorlarga murojaat bilan chiqib, mashinalarni yetkazib berish muddati 2 oyga kechiktirilishini ma’lum qildi.
Ta’kidlanishicha, kompaniya avtomobilni yetkazib berish bo‘yicha ilgari tuzilgan shartnomaning 1.2 bandiga mos ravishda shartnomaga 3.1.1 bandni kiritishga majburligini ma’lum qilgan.
“Boshqacha aytganda, UzAuto Motors’ga bog‘liq bo‘lmagan holatlar tufayli, yarimo‘tkazgichlardan tayyorlangan butlovchi qismlar yetishmovchiligi, global logistika muammolari sababli kompaniya 3.1.1 bandini qo‘llashga hamda 3.1 bandda ko‘rsatilgan avtomobillarning kutilayotgan yetkazib berish muddatini 2 oyga uzaytirishga majbur”, — deyiladi xabarda.
UzAuto Motors ushbu ekstremal chora iste’molchilar tomonidan to‘g‘ri tushunilib, qabul qilinishiga umid qilmoqda.
Eslatib o‘tamiz, UzAuto Motors avgust oyida atigi 2 dona Gentra va birorta ham Spark ishlab chiqarmagandi. Kompaniya buni yarimo‘tkazgichlarning global tanqisligi va ishlab chiqarish bosqichma-bosqich transformatsiya qilingani bilan izohlab, shu doirada yagona platformadagi avtomobillarni ishlab chiqarishga o‘tish rejalashtirilganini ma’lum qilgan edi. Sentabr oxirlarida esa kompaniya Lacetti va Spark ishlab chiqarish tiklanganini e’lon qildi. Oktabr boshida esa UzAuto Motors Lacetti ishlab chiqarish hajmini oshirdi. Oktabr oxiriga borib kompaniya Lacetti va Labo yetkazib berishni 2 oyga kechiktirganini ma’lum qildi.
Izoh (0)