29-noyabr kuni Turkmaniston prezidenti Gurbanguli Berdimuhamedov parlament quyi palatasi raisi, bir nechta bosh vazir o‘rinbosarlari, Ashxobod va viloyatlar hokimlari bilan hududiy rivojlanish, qishloq xo‘jaligi hamda Betaraflik kuni va Yangi yil bayramini nishonlashga tayyorgarlik masalalarini muhokama qilishga bag‘ishlangan onlayn yig‘ilish o‘tkazdi. Bu haqda Turkmaniston davlat axborot agentligiga tayanib, “Xronika Turkmenistana” xabar berdi.
Turkmaniston parlamenti quyi palatasi (Majlis) raisi Gulshat Mammedova Jahon sog‘liqni saqlash tashkiloti Turkmaniston sog‘liqni saqlash sohasida erishilgan keng ko‘lamli ishlar va muvaffaqiyatlarni yuqori baholaganini ta’kidlab, Turkmanistonda parlamentlararo forum o‘tkazish g‘oyasi haqida gapirdi. Berdimuhamedov bu taklifni ma’qulladi.
Davlat rahbari qurilish, sanoat va energetika masalalari bo‘yicha bosh vazir o‘rinbosari Chorimurat Purchekovga obyektlarni belgilangan muddatlarda bitkazish va mamlakatni elektr energiyasi bilan uzluksiz ta’minlash uchun qurilish ishlarini jadallashtirish bo‘yicha topshiriq berdi.
Shuningdek, Berdimuhamedov Ashxobod hokimi Rahim G‘andimovga Betaraflik kuni (12-dekabrda nishonlanadi) va Yangi yil bayramini “munosib tarzda” nishonlashga tayyorgarlik ko‘rishni topshirdi. Bosh vazirning madaniyat va ommaviy axborot vositalari bo‘yicha o‘rinbosari Mehrijamal Mammedova ham bayramni munosib o‘tkazish uchun mas’ul etib tayinlandi.
Viloyatlar hokimlari bayramlarga tayyorgarlik, qishloq xo‘jaligi ishlarining muvaffaqiyatli olib borilayotgani va “aholining ijtimoiy ta’minotini yaxshilashga qaratilgan keng ko‘lamli tadbirlar to‘g‘risida” ma’ruzalar qilgan.
Bosh vazirning qishloq xo‘jaligiga mas’ul o‘rinbosari Esenmurat Orazgeldiyevning aytishicha, dalalarda ayni paytda 1 million 269 ming 838 tonna hosil yig‘ib olingan, belgilangan reja 101,59 foizga bajarilgan.
11-noyabr kuni Berdimuhamedovga 1 million 250 ming tonna paxtani terib olish rejasi bajarilgani haqida hisobot berilgandi. Ma’ruzadan so‘ng davlat rahbari Orazgeldiyevga Turkmaniston bozorlarini yetarli miqdorda sabzavot mahsulotlari bilan ta’minlash maqsadida kuzgi kartoshka va boshqa qishloq xo‘jaligi ekinlarini isrofsiz yig‘ib olish bo‘yicha topshiriq bergan.
Mavzuga doir:
Izoh (0)