Ramzan Qodirov “badjahl va qattiqqo‘l yigitlarni” ayollarga nisbatan ko‘proq hurmatda bo‘lishga chaqirdi

Onalar kunidan so‘ng Checheniston rahbari Ramzan Qodirov ayollarga nisbatan hurmat va g‘amxo‘rlikni kuchaytirish zarurligini ma’lum qildi, deb xabar beradi “Kommersant”. Uning ta’kidlashicha, musulmonlarga xos bo‘lmagan ushbu bayramni nishonlashning yomon tomoni yo‘q.

“Do‘stlar, islom va chechen an’analarining nozik jihatlarini farqlay olmaydigan insonlar chechen jamiyatida xotin-qizlarni yoqtirmaslik mavjud deb xato o‘ylaydi. Nima ham deymiz, hatto ayrim badjahl va qattiqqo‘l yigitlar onalar, opa-singil va turmush o‘rtoqlariga guldastalar, sovg‘a va iliq tabriklar orqali o‘z hurmatini bildirishni uyatli ish deya hisoblaydi. Ajoyib va nozik jins vakillariga nisbatan bu qadar qattiq bo‘lish kerak emas. Busiz ham ularga oson emas”, — deb yozadi u o‘zining “VKontakte”dagi sahifasiga.

Qodirov o‘z postida respublika muftiysi Shayx Salah Mejiyevning Alloh “ayollarga nisbatan sabrli bo‘lish, ularga katta e’tibor qaratish va g‘amxo‘rlik qilish” va ayollarga o‘zi kabi munosabatda bo‘lishni o‘rgatgani haqidagi nasihatini eslab o‘tgan. Checheniston rahbarining fikricha, musulmonlarni Onalar kuni kabi musulmonlarga xos bo‘lmagan bayramni nishonlashda ayblayotganlar “hatto o‘z onalariga minnatdor bo‘lishni bilmaydigan” johillar hisoblanadi.

Avvalroq Checheniston rahbari Ramzan Qodirov chechen parlamenti tomonidan OAVlarga jinoyatchilarning millatini aytishni taqiqlovchi qonun loyihasiga qarshi chiqqan jamoat arboblari va siyosatchilarni tanqid qilgandi. U muqobil variant sifatida har bir jinoyatda jinoyatchilarning millatini aytish taklifini ilgari surgan.