Qirg‘izistonda 28-noyabr kuni bo‘lib o‘tgan parlament saylovlari vaqtida “Ordo” partiyasi yetakchisi Mirbek Miyarov bedarak yo‘qoldi. U saylovda ovoz berganidan keyin g‘oyib bo‘lgan. Miyarovni qidirish ishlari deyarli ikki sutka davom etdi. 30-noyabr kuni uning o‘zi aloqaga chiqdi va tog‘da ko‘ngilsizlikka uchraganini ma’lum qildi, deb yozadi 24.kg.
28-noyabr kuni kechqurun Miyarovni qidirishga militsiya xodimlari ham jalb qilingan, ular siyosiy partiya ofisiga kelib, partiya a’zolaridan tushuntirish xati olgan. Militsiya Miyarovning uyiga ham tashrif buyurgan va oilasidan uning bedarak yo‘qolgani haqida bildirish olgan.
Partiya siyosiy kengashi a’zosi Mirlan Mamitovning so‘zlariga ko‘ra, u Miyarovni oxirgi marta 28-noyabr kuni soat 15.00 (Toshkent vaqti bilan 16.00) atrofida ko‘rgan. Miyarov Bishkekda 44-maktabdagi o‘z saylov uchastkasiga ovoz berish uchun borgan va shundan keyin undan hech qanday darak bo‘lmagan. Miyarovning qo‘l telefoni o‘chirilgan, qarindoshlari va do‘stlaridan hech kim uning qayerda bo‘lishi mumkinligini bilmasdi. Avvalroq partiya a’zolari o‘z rahbarini Milliy xavfsizlik davlat qo‘mitasi (GKNB) xodimlari hibsga olgan bo‘lishi mumkinligini taxmin qilgan, biroq qo‘mita buni rad etgan.
“O‘sha kuni u ovoz berdi, men jarayonni suratga oldim va u suratni chop etishni so‘radi. Keyin u mashinasiga minib, jo‘nab ketdi. Uning g‘oyib bo‘lishi uchun hech qanday sabab yo‘q edi. U yolg‘iz edi, unga hamrohlik qiladigan tansoqchilar bo‘lmagan. Bizda turli xil versiyalar bor, ammo hech biri asosli emas. U uyushgan jinoiy guruh a’zolari bilan aloqaga chiqmagan, shuning uchun uni o‘g‘irlab ketgan bo‘lishlari mumkin deb ayta olmaymiz. Milliy xavfsizlik davlat qo‘mitasi ham uning hibsga olinganini rad etdi. Undan oldin GKNB uni so‘roqqa olib ketishgan deb o‘ylagandik, shuning uchun politsiyaga bormagandik”, — dedi Mamitov.
Mirbek Miyarov partiya ro‘yxatida birinchi raqam ostida o‘z nomzodini qo‘ygandi. Qirg‘iziston Markaziy saylov komissiyasining dastlabki ma’lumotlariga ko‘ra, “Ordo” partiyasi bor-yo‘g‘i 0,45 foiz (qo‘lda sanash natijalariga ko‘ra – 0,5 foiz) ovoz olgan va parlamentga kirmagan.
2020-yil oktabr oyida Miyarov prezidentning Chuy viloyatidagi vakolatli vakili etib tayinlangan edi, biroq 2021-yilning mart oyida u lavozimidan chetlashtirilgan va uning o‘rniga Erkin Tentishev tayinlangan. Vazirlar Mahkamasi Miyarov “boshqa ishga o‘tgani munosabati bilan” egallab turgan lavozimidan ozod etilganini ma’lum qilgan.
“KTRK” efirida bo‘lib o‘tgan saylovoldi teledebatlarida Miyorov amaldagi hukumatning kadrlar siyosatini tanqid qilib, aholining hozir nafaqat parlamentga, balki butun hukumatga ham ishonchi yo‘qligini aytgan.
“Har bir kelgan hukumat o‘zicha ish qiladi. Har kuni ‘knopkali’ deputatlar yordamida qanchadan qancha qonunlar qabul qilinmoqda, ular esa mamlakatimiz kelajagini barbod qilmoqda. Biz buni to‘xtatishimiz kerak. Odamlar hatto saylovga ham bormaydi, boradiganlar juda oz. Ammo bunday bo‘lmasligi kerak, chunki amaldorlar o‘z cho‘ntaklarini qappaytirmoqda”, — degan Miyarov.
24.kg nashrining xabar berishicha, 30-noyabr kuni tushdan keyin Miyarov topilgan. Uning o‘zi aloqaga chiqib, ovoz berishdan keyin tog‘ga ketganini, o‘sha yerda mashinasi buzilib qolganini va telefonining zaryadi o‘chganini aytgan.
28-noyabr kuni Qirg‘izistonda parlament saylovlari bo‘lib o‘tdi. Qirg‘iziston markaziy saylov komissiyasi bergan ma’lumotlarga ko‘ra, parlament saylovlarida 50 foizdan ortiq byulletenlar o‘rganib chiqilganidan keyin “Ota yurt Qirg‘iziston” partiyasi (ayni vaqtda mamlakatdagi hukmron partiya) yetakchilik qilgan.
Keyinroq Qirg‘izistondagi beshta partiya saylovlar natijasini tan olishdan bosh tortgani xabar qilingan.
Izoh (0)