29 ноябрь куни Туркманистон президенти Гурбангули Бердимуҳамедов парламент қуйи палатаси раиси, бир нечта бош вазир ўринбосарлари, Ашхобод ва вилоятлар ҳокимлари билан ҳудудий ривожланиш, қишлоқ хўжалиги ҳамда Бетарафлик куни ва Янги йил байрамини нишонлашга тайёргарлик масалаларини муҳокама қилишга бағишланган онлайн йиғилиш ўтказди. Бу ҳақда Туркманистон давлат ахборот агентлигига таяниб, «Хроника Туркменистана» хабар берди.
Туркманистон парламенти қуйи палатаси (Мажлис) раиси Гулшат Маммедова Жаҳон соғлиқни сақлаш ташкилоти Туркманистон соғлиқни сақлаш соҳасида эришилган кенг кўламли ишлар ва муваффақиятларни юқори баҳолаганини таъкидлаб, Туркманистонда парламентлараро форум ўтказиш ғояси ҳақида гапирди. Бердимуҳамедов бу таклифни маъқуллади.
Давлат раҳбари қурилиш, саноат ва энергетика масалалари бўйича бош вазир ўринбосари Чоримурат Пурчековга объектларни белгиланган муддатларда битказиш ва мамлакатни электр энергияси билан узлуксиз таъминлаш учун қурилиш ишларини жадаллаштириш бўйича топшириқ берди.
Шунингдек, Бердимуҳамедов Ашхобод ҳокими Раҳим Ғандимовга Бетарафлик куни (12 декабрда нишонланади) ва Янги йил байрамини «муносиб тарзда» нишонлашга тайёргарлик кўришни топширди. Бош вазирнинг маданият ва оммавий ахборот воситалари бўйича ўринбосари Меҳрижамал Маммедова ҳам байрамни муносиб ўтказиш учун масъул этиб тайинланди.
Вилоятлар ҳокимлари байрамларга тайёргарлик, қишлоқ хўжалиги ишларининг муваффақиятли олиб борилаётгани ва «аҳолининг ижтимоий таъминотини яхшилашга қаратилган кенг кўламли тадбирлар тўғрисида» маърузалар қилган.
Бош вазирнинг қишлоқ хўжалигига масъул ўринбосари Эсенмурат Оразгелдиевнинг айтишича, далаларда айни пайтда 1 миллион 269 минг 838 тонна ҳосил йиғиб олинган, белгиланган режа 101,59 фоизга бажарилган.
11 ноябрь куни Бердимуҳамедовга 1 миллион 250 минг тонна пахтани териб олиш режаси бажарилгани ҳақида ҳисобот берилганди. Маърузадан сўнг давлат раҳбари Оразгелдиевга Туркманистон бозорларини етарли миқдорда сабзавот маҳсулотлари билан таъминлаш мақсадида кузги картошка ва бошқа қишлоқ хўжалиги экинларини исрофсиз йиғиб олиш бўйича топшириқ берган.
Изоҳ (0)