Gurbanguli Berdimuhamedov Turkmanistonda neft-gaz kompleksi nazoratini o‘g‘liga topshirdi

Turkmaniston prezidenti Gurbanguli Berdimuhamedov o‘g‘li, iqtisodiyot bo‘yicha bosh vazir o‘rinbosari Serdar Berdimuhamedovga mamlakatning neft-gaz kompleksini nazorat qilish vazifasini topshirdi. Bu haqda “Neytralniy Turkmaniston” gazetasi xabar berdi.

Serdar Berdimuhamedov neft-gaz kompleksining moliyaviy holatini, jumladan, uning salohiyatini ro‘yobga chiqarish bo‘yicha sa’y-harakatlarni muntazam kuzatib borishi, ushbu sohani doimiy nazorat qilishga mas’ul rahbar etib belgilandi. Turkmaniston gaz eksporti geografiyasini qisqa, o‘rta va uzoq muddatli asosda kengaytirishni rejalashtirgan, deyiladi xabarda.

Shuningdek, Turkmaniston prezidenti yonilg‘i zaxirasi bo‘yicha dunyoda yetakchi o‘rinlardan birini egallab turgan Galkinish konidagi ishlarni faollashtirish yuzasidan ham ko‘rsatmalar bergan.

Serdar Berdimuhamedov 40 yoshda. U Gurbanguli Berdimuhamedovning yagona o‘g‘li. 2020-yilning fevralida Serdar Berdimuhamedov sanoat vaziri lavozimini egallagan, 2021-yilning fevralidan esa Turkmaniston bosh vaziri o‘rinbosari lavozimida ishlab kelayotgan edi. Iyul oyida Serdar Berdimuhamedov bosh vazirning moliya va iqtisodiyot bo‘yicha o‘rinbosari etib tayinlangan.

Turkmanistonda bosh vazir lavozimi yo‘q va hukumatni rahbar sifatida prezidentning o‘zi boshqaradi.