AQSh Savdo vazirligining Sanoat va xavfsizlik byurosi Xitoyning 27 kompaniyasini AQSh bilan biznes yuritishi taqiqlangan tashkilotlar ro‘yxatiga kiritdi. Byurodagilarning fikriga ko‘ra, ushbu kompaniyalarning kvant hisoblash sohasidagi ishlanmalaridan harbiylar foydalanmoqda, deb yozadi Financial Times.
AQSh savdo vaziri Jina Raymondoning aytishicha, sakkizta Xitoy kompaniyasi harbiy sohani rivojlantirishga qaratilgan “Pekin loyihalari” ustida ishlamoqda. Ular orasida yashirin texnologiyalar va suvosti kemalari bilan texnikalarni topishga, shuningdek, AQShning shifrlash tizimlarini buzishga qodir dasturlar bor.
Siyosatchi Martin Rasserning so‘zlariga ko‘ra, ro‘yxat Xitoy hukumatining harbiy sohada qo‘llanilishi mumkin bo‘lgan ilg‘or texnologiyalarni qo‘lga kiritishiga yo‘l qo‘ymaslik maqsadida tashlangan so‘nggi qadamdir.
“Bu oqilona qadam va Xitoyning texnologik yutuqlarga erishish bo‘yicha sa’y-harakatlarining ko‘lami haqida muhim eslatma. Aynan ular AQShning milliy xavfsizligiga putur yetkazmoqda”, — dedi Marten Rasser.
AQSh hukumati “qora ro‘yxat”ga, shuningdek, Pokiston, Yaponiya va Singapurning 13 kompaniyasini kiritdi. Qayd etilishicha, ular yadroviy va ballistik raketa dasturlari bilan bog‘liq loyihalar bilan shug‘ullangan.
Iyun oyida AQSh prezidenti Jo Bayden Vashington nazdida Xitoy harbiy-sanoat kompleksiga aloqasi bo‘lgan 59 ta tashkilotni “qora ro‘yxat”ga kiritgan edi. Ular orasida dunyodagi eng yirik telekommunikatsion kompaniyalardan Huawei, China Mobile Communications Group Co., Ltd., China Telecommunications Corporation va boshqa aloqa korxonalari bor.
Izoh (0)