Prezident Shavkat Mirziyoyev 23-noyabr kuni Toshkentning Shayxontohur tumanidagi “Olim Xo‘jayev” mahallasida bo‘lgan edi. Bu yerda 1959—1962-yillarda qurilgan ikki qavatli uylarni renovatsiya dasturi asosida yangilash rejalashtirilgan, deya xabar bermoqda “Gazeta.uz”.
Shavkat Mirziyoyev renovatsiya loyihasini shu yerdagi uylarning birida yashovchi Muhtaram Beknazarova bilan muhokama qildi (u taniqli xonanda Sevara Nazarxonning onasi bo‘lib chiqdi). Prezidentning so‘zlariga ko‘ra, u aholining uylar nam va zaxligidan shikoyat qilib, yashash sharoitlarini yaxshilab berishni so‘rab yozgan xatlarini olgan.
Muhtaram Beknazarovaning ma’lum qilishicha, bu uylar greklar tomonidan qurilgan. U bu yerda 25 yildan beri yashaydi, imoratlar qurilganiga esa salkam 65 yil to‘lgan.
“Foydalanish muddati o‘tib ketgan”, — dedi prezident. Ayol uning fikrini tasdiqlab, ayni vaqtda bu yerda yashash unga yoqishini ham ta’kidlab o‘tdi.
“Foydalanish muddati o‘tib ketgani uchun, qurilishda foydalanilgan materiallar ham yoshini yashab bo‘lgan. Ertaga, Xudo ko‘rsatmasin, biror falokat bo‘lsa… Zax va kasalliklarni inobatga olib, shu joyning o‘zida ko‘p qavatli, chiroyli qilib, hamma o‘zining yashash maydonini — sal ko‘paytirib bo‘lsa ham — oldilaringda qurib, ko‘chirib, keyin bu uylarni buzmoqchimiz”, — deya rejalar bilan o‘rtoqlashdi Shavkat Mirziyoyev.
Qurilish vaziri birinchi o‘rinbosari Davron Odilov “O‘zbekiston 24” telekanaliga bergan intervyusida hududda hozirda 568 xonadonli 42 ta ikki qavatli uy joylashganini ma’lum qildi. Yangi mavze 10,5 gektar maydonni egallashi kutilmoqda. Eski xonadonlarning egalari yangi qurilgan uylardan kvartira oladi.
“Masalan, hozirgi uydagi maydoni 29 kvadrat metr bo‘lgan bir xonalik uy o‘rniga ular maydoni 33, 34, 35 kvadrat metr bo‘lgan bir xonalik, maydoni 42 kvadrat metr bo‘lgan eski ikki xonalik o‘rniga 50 kvadrat metrlik yangi ikki xonalik, 47, 50, 54 kvadratlik uch xonalik xonadonlar o‘rniga 60 kvadrat metrlik yangi uch xonalik kvartiralar beriladi. Bu degani, yashovchilarning kvartiralari maydoni 5—10 foizga kattalashadi”, — dedi u.
Uning so‘zlariga ko‘ra, dastlabki bosqichda yangi uylarni qurish ishlari Shayxontohur tuman elektr tarmoqlari va boshqa korxonalar hududidan boshlanadi, bu korxonalar boshqa joylarga ko‘chiriladi.
“Biz dastlab ushbu korxonalarning hududlaridan foydalanamiz, qurilish-montaj ishlarini olib boramiz, dastlabki ko‘p qavatli uylarni quramiz, so‘ng odamlarni bu uylarga ko‘chiramiz. Biz prezidentdan shunday ko‘rsatma oldik”, — dedi qurilish vaziri birinchi o‘rinbosari.
Taqdimotga ko‘ra, qurilishning umumiy maydoni 267,6 ming kvadrat metrni tashkil etadi. Bunda yashil hududlar 7,85 gektar maydonni egallaydi. Yangi mavzeda 9, 12 va 16 qavatli uylar qurilishi ko‘zda tutilgan.
Loyiha 1 trillion so‘mga baholanmoqda, budjetga tushumlar hajmi 200 milliard so‘mni tashkil etadi. Yangi qurilgan uylarda 2320 ta kvartira bo‘ladi, ularning 568 tasi eski (ikki qavatli) “dom”larda yashovchilarga beriladi.
Bundan tashqari, 660 o‘ringa mo‘ljallangan yangi maktab binosi, 1380 o‘rinli avtoturargoh qurilishi va bolalar bog‘chasidagi o‘rinlar sonini 180 taga ko‘paytirish rejalashtirilgan. Loyiha amalga oshirilishi natijasida 400 ta, qurilish ishlari davomida esa 2000 ta yangi ish o‘rinlari tashkil etiladi.
May oyida Shavkat Mirziyoyev 2021-yil oxirigacha bir qator hududlarda yashashga yaroqsiz ahvoldagi 212 ta ikki qavatli uylarni renovatsiya dasturi asosida yangidan qurish haqida ko‘rsatma bergan edi. Yana 456 ta avariya holatidagi uyni ta’mirlash ko‘zda tutilgan edi. Ko‘p qavatli uylardagi ta’mirlash ishlarini moliyalashtirish uchun Uy-joy kommunal xizmat ko‘rsatish vazirligi huzurida maxsus jamg‘arma tashkil etilishi belgilangan edi.
Izoh (0)