Президент Шавкат Мирзиёев 23 ноябрь куни Тошкентнинг Шайхонтоҳур туманидаги «Олим Хўжаев» маҳалласида бўлган эди. Бу ерда 1959—1962 йилларда қурилган икки қаватли уйларни реновация дастури асосида янгилаш режалаштирилган, дея хабар бермоқда «Gazeta.uz».
Шавкат Мирзиёев реновация лойиҳасини шу ердаги уйларнинг бирида яшовчи Муҳтарам Бекназарова билан муҳокама қилди (у таниқли хонанда Севара Назархоннинг онаси бўлиб чиқди). Президентнинг сўзларига кўра, у аҳолининг уйлар нам ва захлигидан шикоят қилиб, яшаш шароитларини яхшилаб беришни сўраб ёзган хатларини олган.
Муҳтарам Бекназарованинг маълум қилишича, бу уйлар греклар томонидан қурилган. У бу ерда 25 йилдан бери яшайди, иморатлар қурилганига эса салкам 65 йил тўлган.
«Фойдаланиш муддати ўтиб кетган», — деди президент. Аёл унинг фикрини тасдиқлаб, айни вақтда бу ерда яшаш унга ёқишини ҳам таъкидлаб ўтди.
«Фойдаланиш муддати ўтиб кетгани учун, қурилишда фойдаланилган материаллар ҳам ёшини яшаб бўлган. Эртага, Худо кўрсатмасин, бирор фалокат бўлса… Зах ва касалликларни инобатга олиб, шу жойнинг ўзида кўп қаватли, чиройли қилиб, ҳамма ўзининг яшаш майдонини — сал кўпайтириб бўлса ҳам — олдиларингда қуриб, кўчириб, кейин бу уйларни бузмоқчимиз», — дея режалар билан ўртоқлашди Шавкат Мирзиёев.
Қурилиш вазири биринчи ўринбосари Даврон Одилов «Ўзбекистон 24» телеканалига берган интервьюсида ҳудудда ҳозирда 568 хонадонли 42 та икки қаватли уй жойлашганини маълум қилди. Янги мавзе 10,5 гектар майдонни эгаллаши кутилмоқда. Эски хонадонларнинг эгалари янги қурилган уйлардан квартира олади.
«Масалан, ҳозирги уйдаги майдони 29 квадрат метр бўлган бир хоналик уй ўрнига улар майдони 33, 34, 35 квадрат метр бўлган бир хоналик, майдони 42 квадрат метр бўлган эски икки хоналик ўрнига 50 квадрат метрлик янги икки хоналик, 47, 50, 54 квадратлик уч хоналик хонадонлар ўрнига 60 квадрат метрлик янги уч хоналик квартиралар берилади. Бу дегани, яшовчиларнинг квартиралари майдони 5—10 фоизга катталашади», — деди у.
Унинг сўзларига кўра, дастлабки босқичда янги уйларни қуриш ишлари Шайхонтоҳур туман электр тармоқлари ва бошқа корхоналар ҳудудидан бошланади, бу корхоналар бошқа жойларга кўчирилади.
«Биз дастлаб ушбу корхоналарнинг ҳудудларидан фойдаланамиз, қурилиш-монтаж ишларини олиб борамиз, дастлабки кўп қаватли уйларни қурамиз, сўнг одамларни бу уйларга кўчирамиз. Биз президентдан шундай кўрсатма олдик», — деди қурилиш вазири биринчи ўринбосари.
Тақдимотга кўра, қурилишнинг умумий майдони 267,6 минг квадрат метрни ташкил этади. Бунда яшил ҳудудлар 7,85 гектар майдонни эгаллайди. Янги мавзеда 9, 12 ва 16 қаватли уйлар қурилиши кўзда тутилган.
Лойиҳа 1 триллион сўмга баҳоланмоқда, бюджетга тушумлар ҳажми 200 миллиард сўмни ташкил этади. Янги қурилган уйларда 2320 та квартира бўлади, уларнинг 568 таси эски (икки қаватли) «дом»ларда яшовчиларга берилади.
Бундан ташқари, 660 ўринга мўлжалланган янги мактаб биноси, 1380 ўринли автотураргоҳ қурилиши ва болалар боғчасидаги ўринлар сонини 180 тага кўпайтириш режалаштирилган. Лойиҳа амалга оширилиши натижасида 400 та, қурилиш ишлари давомида эса 2000 та янги иш ўринлари ташкил этилади.
Май ойида Шавкат Мирзиёев 2021 йил охиригача бир қатор ҳудудларда яшашга яроқсиз аҳволдаги 212 та икки қаватли уйларни реновация дастури асосида янгидан қуриш ҳақида кўрсатма берган эди. Яна 456 та авария ҳолатидаги уйни таъмирлаш кўзда тутилган эди. Кўп қаватли уйлардаги таъмирлаш ишларини молиялаштириш учун Уй-жой коммунал хизмат кўрсатиш вазирлиги ҳузурида махсус жамғарма ташкил этилиши белгиланган эди.
Изоҳ (0)