So‘nggi yillarda O‘zbekistonda ko‘p qavatli uylar qurilishi keskin ko‘paydi. Afsuski, noqonuniy qurilish qilayotgan tadbirkorlar va yangi ko‘p kvartirali uy quraman deb fuqarolar ishonchiga kirib, aldov yo‘li bilan ularning pulini olishni maqsad qilganlar ham tez-tez uchramoqda.
Ulush kiritish asosida qurilayotgan uy-joylardan xarid qilishda fuqarolar bilishi kerak bo‘lgan muhim holatlar bor.
O‘zbekiston Respublikasi Prezidentining 2020-yil 27-maydagi “Ko‘p kvartirali uylarni ulush kiritish asosida qurish jarayonini tartibga solish chora-tadbirlari haqida”gi PQ 4732-son qaroriga asosan ulush kiritish asosida qurish elektron platformasi shakllantirilgan.
Uy sotib olayotgan fuqaro Qurilish vazirligining elektron platformasidan https://mc.uz/ulushdor/ ushbu havola orqali xususiy tadbirkorlar tomonidan qurilayotgan uyning ro‘yxatdan o‘tgan yoki o‘tmaganligini tekshirishi kerak. Yuqorida ko‘rsatilgan havola orqali hamma uchun ochiq bo‘lgan majmua nomi, quruvchi tashkilot nomi, manzili va shu kabi ma’lumotlarni olish mumkin.
Qurilish tashkilotlari qay tartibda ro‘yxatdan o‘tkaziladi?
Qurilish tashkiloti qurilayotgan uyning ma’lumotlarini elektron tartibda platformaga yuklaydi, shundan so‘ng vakolatli organning mas’ul xodimi ma’lumotlarni ko‘rib chiqadi va 3 ish kuni ichida belgilangan tartibda ro‘yxatdan o‘tkaziladi.
Elektron ro‘yxatga kiritish uchun quruvchilar quyidagi talablarga javob berishlari lozim:
- ko‘p kvartirali uylarni qurish uchun belgilangan tartibda ajratilgan yer uchastkasi va qurilish ishlarini amalga oshirishga birlamchi ruxsat beruvchi hujjatlarning mavjudligi;
- qurilish majmuasiga kiradigan ko‘p kvartirali uylar va boshqa qurilish obyektlari qiymatining 20 foizidan kam bo‘lmagan miqdorda o‘z moliyaviy resurslari yoki mazkur mablag‘larga yoxud uning yetishmayotgan qismiga kredit ajratish haqida bank kafolat xatining mavjudligi;
- qurilish majmuasi uchun loyiha-smeta hujjatlari va ijobiy ekspertiza xulosasining mavjudligi;
- texnik va mualliflik nazorati hamda davlat nazoratini amalga oshirish bo‘yicha tegishli shartnomalarning tuzilganligi;
- ulushdorlar tomonidan kiritilgan mablag‘larni jalb qilish uchun tijorat bankida alohida hisobvaraq ochilganligi.
Qurilish davomida fuqarolar mablag‘ini qurilish ishlariga jalb qilayotgan qurilish tashkilotlari elektron platformada ro‘yxatdan o‘tishi shart. Ro‘yxatdan o‘tmasdan turib, qurilish ishlariga fuqarolarning mablag‘larini jalb qilish mumkin emasligi belgilangan hamda elektron platformadan ro‘yxatdan o‘tmagan qurilish tashkilotlari qurayotgan ko‘p qavatli turar joy majmuasini reklama qilishi hamda ulushdorning mablag‘larini qurilishga jalb qilishi mumkin emas.
Bino ekspluatatsiyasining kafolat muddati 2 yil bo‘lib, uylar foydalanishga topshirilgandan so‘ng qurilish tashkiloti bino ekspluatatsiyasini amalga oshiradi.
Shuningdek, qarorga asosan ulushdor fuqarolar quyidagilarga:
- qurilish obyektidagi qurilish ishlari holati bilan tanishishga;
- shartnoma shartlari bajarilishi bo‘yicha quruvchidan yozma shaklda ma’lumot talab qilishga;
- qurilish obyektlarini qurish ustidan texnik, shuningdek, mablag‘larning maqsadli ishlatilishi ustidan nazoratni qonun hujjatlarida belgilangan tartibda yuridik shaxslarni yoki mutaxassislarni jalb qilish orqali amalga oshirishga haqli.
Ko‘p kvartirali uy-joylarni ulush kiritish asosida qurayotgan qurilish-pudrat tashkilotlari yuqoridagi qarorga asosan faoliyat olib borishlari lozim.
Reklama huquqi asosida.
Izoh (0)