Taraqqiyotning istiqbolli bosqichiga o‘tayotgan yangi O‘zbekistonda keng ko‘lamli islohotlar qatorida milliy iqtisodiyotimizning muhim quvvat manbai hisoblangan gidroenergetika tarmog‘i ham izchil rivojlanmoqda.
Mamlakatimiz gidroenergetika sohasi taraqqiyotida “O‘zbekgidroenergo” aksiyadorlik jamiyatining tizim tashkiloti hisoblangan “Gidroproyekt” aksiyadorlik jamiyatining muhim o‘rni bor.
“Gidroproyekt” AJ O‘zbekiston Respublikasining gidrotexnika va gidroenergetika inshootlarini loyihalash, ularning qurilishini qo‘llab-quvvatlash sohasidagi bosh tashkilot hisoblanadi.
“Gidroproyekt” AJning asosiy faoliyat turlariga gidrotexnik loyihalashtirish va qurish, gidroenergetik, gidrotexnik obyektlarni kompleks loyihalashtirish, yuqori xavfli obyektlar va potensial xavfli sanoat tarmoqlarida loyiha-qidiruv va tajriba-laborator ishlarini kompleks amalga oshirish kiradi.
Bugun, 26-noyabr kuni “Gidroproyekt” aksiyadorlik jamiyatining 90 yilligiga bag‘ishlangan tadbir bo‘lib o‘tdi.
Ushbu tantanali marosim “Gidroproyekt” AJ ma’muriy binosining majlislar zalida tashkil etildi. Tadbirda Oliy Majlis palatalari a’zolari, davlat idora va muassasalari, hamkor xorijiy tashkilotlar vakillari, “O‘zbekgidroenergo” AJ va tizim korxona hamda tashkilotlari, “Gidroproyekt” AJ rahbariyati va mutaxassislari, televideniye va radio, bosma va elektron OAV vakillari hamda jurnalistlar ishtirok etishdi.
Tadbirda so‘zga chiqqan martabali mehmonlar, faxriy va tajribali mutaxassislar tomonidan “Gidroproyekt” AJning O‘zbekiston tarixidagi o‘rni, mamlakatning ijtimoiy-iqtisodiy rivojlanishi uchun muhim o‘rin tutgan energetika, xususan, gidroenergetika obyektlarini har tomonlama puxta va sifatli tarzda loyihalashtirishdagi o‘rni va ahamiyati borasida fikr-mulohaza bildirildi, AJ rahbariyati va jamoasiga 90 yillik yubiley munosabati bilan samimiy tilaklar va ezgu tabriklar yo‘llandi. Shu bilan birga, tashkilotning kelgusi faoliyatida ulkan marralar, zalvorli yutuq va muvaffaqiyatlarni zabt etishiga umid bildirildi.
Tashkilot tarixiga nazar solsak, 1931-yil mart oyida Birinchi O‘rta Osiyo energetika qurultoyida O‘rta Osiyo respublikalarining elektrifikatsiya bosh rejasining qabul qilinishi “Gidroproyekt” institutining tashkil etilishiga turtki berdi.
Institut (hozirda “Gidroproyekt” AJ) uzoq yillar mobaynida nafaqat O‘zbekiston, balki Markaziy Osiyo va xorijiy mamlakatlar uchun muhim gidroenergetik loyihalarni amalga oshirdi. Shuningdek, tashkilot faoliyatining asosiy yo‘nalishlari bo‘yicha, xususan, gidrotexnik loyihalashtirish va qurish, gidroenergetik, gidrotexnik obyektlarni kompleks loyihalashtirish, yuqori xavfli obyektlar, potensial xavfli sanoat tarmoqlarida loyiha-qidiruv va tajriba-laborator ishlari tajribali, malakali mutaxassislar tomonidan bajarildi.
Bugungi kunda O‘zbekiston Respublikasi Prezidentining 2017-yil 18-maydagi PF 5044-son farmoni asosida “Gidroproyekt” AJ “O‘zbekgidroenergo” AJning tashkiliy tuzilmasi tarkibiga kirdi va samarali faoliyat yuritmoqda.
Tantanali tadbirda “Gidroproyekt” AJning 90 yillik yubileyiga bag‘ishlangan maxsus jurnal hamda logotip rebrendingi taqdimoti, tashkilot faoliyatini o‘zida aks ettirgan korporativ uslub va videoroliklar taqdimoti bo‘lib o‘tdi. Jumladan, 2021-yil 13—14-noyabr kunlari “Gidroproyekt” AJ xodimlari tomonidan olis “Kungurbuk” cho‘qqisining zabt etilganligi haqidagi videorolik namoyish qilindi. “Gidroproyekt” AJ rasmiy veb-saytining yangi versiyasi va institutning 90 yilligiga bag‘ishlangan veb-sayt taqdimoti o‘tkazildi. Shu bilan sohada samarali faoliyat yuritgan bir guruh xodimlar “Gidroenergetika iftixori” ko‘krak nishoni bilan taqdirlandi.
Shuningdek, tadbirning tantanali qismi doirasida “Gidroproyekt” AJ hamda bir qator tashkilotlar o‘rtasida hamkorlik memorandumlari imzolandi.
Ta’kidlash joizki, tantanali tadbir doirasida poytaxtimiz markazidagi “Do‘stlik” istirohat bog‘ida “Gidroenergetiklar xiyoboni”ning tantanali ochilish marosimiga bag‘ishlangan bayram tadbiri tashkil etildi. Xiyobon barpo etilishi joriy yilning 20-noyabr kuni O‘zbekiston Respublikasi Prezidenti tashabbusi bilan amalga oshirilayotgan “Yashil makon” umummilliy loyihasi doirasida bo‘lib o‘tdi. Xiyobon hududiga “Gidroproyekt” AJ O‘zbekiston Ekologik partiyasi bilan hamkorlikda 150 tupdan ortiq manzarali daraxt ko‘chatlari ekildi.
Alohida ta’kidlash lozimki, “Gidroproyekt” AJ o‘zining 90 yillik faoliyati davomida nafaqat mamlakatimizda, balki Markaziy Osiyo respublikalari va boshqa davlatlar (xususan, Qirg‘iziston, Tojikiston, Qozog‘iston, Turkmaniston, Afg‘oniston, Vetnamda 37 ta GES)da qurilgan va modernizatsiya qilingan 100 dan ortiq GESlarni (umumiy o‘rnatilgan quvvati 10 GVt dan ortiq) loyihalashtirgan.
Hozirgi kunda, 2021-yil holatiga “Gidroproyekt” AJ tomonidan umumiy o‘rnatilgan quvvati 757,0 MVt bo‘lgan 11 ta GESni loyihalash va qurilishini ta’minlash ustida ishlanmoqda.
Reklama huquqi asosida.
Izoh (0)