Сўнгги йилларда Ўзбекистонда кўп қаватли уйлар қурилиши кескин кўпайди. Афсуски, ноқонуний қурилиш қилаётган тадбиркорлар ва янги кўп квартирали уй қураман деб фуқаролар ишончига кириб, алдов йўли билан уларнинг пулини олишни мақсад қилганлар ҳам тез-тез учрамоқда.
Улуш киритиш асосида қурилаётган уй-жойлардан харид қилишда фуқаролар билиши керак бўлган муҳим ҳолатлар бор.
Ўзбекистон Республикаси Президентининг 2020 йил 27 майдаги «Кўп квартирали уйларни улуш киритиш асосида қуриш жараёнини тартибга солиш чора-тадбирлари ҳақида»ги ПҚ 4732-сон қарорига асосан улуш киритиш асосида қуриш электрон платформаси шакллантирилган.
Уй сотиб олаётган фуқаро Қурилиш вазирлигининг электрон платформасидан https://mc.uz/ulushdor/ ушбу ҳавола орқали хусусий тадбиркорлар томонидан қурилаётган уйнинг рўйхатдан ўтган ёки ўтмаганлигини текшириши керак. Юқорида кўрсатилган ҳавола орқали ҳамма учун очиқ бўлган мажмуа номи, қурувчи ташкилот номи, манзили ва шу каби маълумотларни олиш мумкин.
Қурилиш ташкилотлари қай тартибда рўйхатдан ўтказилади?
Қурилиш ташкилоти қурилаётган уйнинг маълумотларини электрон тартибда платформага юклайди, шундан сўнг ваколатли органнинг масъул ходими маълумотларни кўриб чиқади ва 3 иш куни ичида белгиланган тартибда рўйхатдан ўтказилади.
Электрон рўйхатга киритиш учун қурувчилар қуйидаги талабларга жавоб беришлари лозим:
- кўп квартирали уйларни қуриш учун белгиланган тартибда ажратилган ер участкаси ва қурилиш ишларини амалга оширишга бирламчи рухсат берувчи ҳужжатларнинг мавжудлиги;
- қурилиш мажмуасига кирадиган кўп квартирали уйлар ва бошқа қурилиш объектлари қийматининг 20 фоизидан кам бўлмаган миқдорда ўз молиявий ресурслари ёки мазкур маблағларга ёхуд унинг етишмаётган қисмига кредит ажратиш ҳақида банк кафолат хатининг мавжудлиги;
- қурилиш мажмуаси учун лойиҳа-смета ҳужжатлари ва ижобий экспертиза хулосасининг мавжудлиги;
- техник ва муаллифлик назорати ҳамда давлат назоратини амалга ошириш бўйича тегишли шартномаларнинг тузилганлиги;
- улушдорлар томонидан киритилган маблағларни жалб қилиш учун тижорат банкида алоҳида ҳисобварақ очилганлиги.
Қурилиш давомида фуқаролар маблағини қурилиш ишларига жалб қилаётган қурилиш ташкилотлари электрон платформада рўйхатдан ўтиши шарт. Рўйхатдан ўтмасдан туриб, қурилиш ишларига фуқароларнинг маблағларини жалб қилиш мумкин эмаслиги белгиланган ҳамда электрон платформадан рўйхатдан ўтмаган қурилиш ташкилотлари қураётган кўп қаватли турар жой мажмуасини реклама қилиши ҳамда улушдорнинг маблағларини қурилишга жалб қилиши мумкин эмас.
Бино эксплуатациясининг кафолат муддати 2 йил бўлиб, уйлар фойдаланишга топширилгандан сўнг қурилиш ташкилоти бино эксплуатациясини амалга оширади.
Шунингдек, қарорга асосан улушдор фуқаролар қуйидагиларга:
- қурилиш объектидаги қурилиш ишлари ҳолати билан танишишга;
- шартнома шартлари бажарилиши бўйича қурувчидан ёзма шаклда маълумот талаб қилишга;
- қурилиш объектларини қуриш устидан техник, шунингдек, маблағларнинг мақсадли ишлатилиши устидан назоратни қонун ҳужжатларида белгиланган тартибда юридик шахсларни ёки мутахассисларни жалб қилиш орқали амалга оширишга ҳақли.
Кўп квартирали уй-жойларни улуш киритиш асосида қураётган қурилиш-пудрат ташкилотлари юқоридаги қарорга асосан фаолият олиб боришлари лозим.
Реклама ҳуқуқи асосида.
Изоҳ (0)