Turkmaniston Jahon savdo tashkilotiga (JST) a’zo bo‘lish uchun ariza berdi. Bu haqda tashkilot bosh direktori Ngozi Okonjo-Iveala Twitter’da ma’lum qilgan, yozadi “Interfaks”.
Turkmanistonning ORIENT axborot agentligi xabariga ko‘ra, JST bosh direktoriga yo‘llangan ariza xati Turkmaniston prezidenti Gurbanguli Berdimuhamedovning o‘g‘li, bosh vazir o‘rinbosari Serdar Berdimuhamedov tomonidan imzolangan. Arizani Turkmanistonning Birlashgan Millatlar Tashkiloti Jeneva bo‘limidagi doimiy vakili Atageldi Haljanov topshirgan.
Ariza JSTga a’zo davlatlar va kuzatuvchilar tomonidan 2021-yil 30-noyabrdan 3-dekabrgacha Jenevada bo‘lib o‘tadigan 12-Vazirlar konferensiyasida ko‘rib chiqiladi. Konferensiya so‘nggi to‘rt yil ichida birinchi marta o‘tkazilmoqda. Konferensiya yalpi majlisida Turkmaniston moliya va iqtisodiyot vaziri Muhammetgeldi Serdarovning so‘zga chiqishi rejalashtirilgan.
2020-yilning iyul oyida Turkmanistonga JSTda kuzatuvchi maqomi berilgandi.
Jahon savdo tashkiloti 1995-yilda tashkil topgan. JSTning maqsadi — qoidalarga asoslangan tizim doirasida savdoni tartibga solishga yordam berish, shuningdek, hukumatlar o‘rtasidagi savdo kelishmovchiliklarini obyektiv hal qilish va savdo muzokaralarini tashkil etish. Ushbu faoliyatning asosini JSTning 60 ta kelishuvi tashkil etadi.
Hozirgi vaqtda JST tarkibiga 164 davlat, ikkita qaram hudud (Gonkong va Makao) hamda Yevropa Ittifoqi kiradi.
Eslatib o‘tamiz, Shavkat Mirziyoyev 26-noyabr kuni O‘zbekistonda amaliy tashrif bilan bo‘lib turgan JST bosh kotibi Kunio Mikuriyani qabul qildi. Qayd etilishicha, suhbat davomida O‘zbekiston va ushbu xalqaro tuzilma o‘rtasidagi o‘zaro manfaatli hamkorlikni yanada kengaytirish masalalari ko‘rib chiqilgan. O‘zbekistonning tez fursatda Jahon savdo tashkilotiga kirishi bilan bog‘liq masalalarda yaqindan hamkorlik qilish zarur ekani ta’kidlangan. O‘zbekiston va Jahon bojxona tashkiloti o‘rtasidagi amaliy sheriklikni kengaytirish bo‘yicha yangi “yo‘l xaritasi”ni qabul qilishga kelishib olingan.
Izoh (0)