Solomon orollari poytaxti Xoniarada hukumatga qarshi o‘tkazilayotgan norozilik namoyishlari ishtirokchilari binolarga o‘t qo‘yib, do‘konlarga o‘g‘irlikka tushmoqda, deb xabar beradi “TASS”. Tartibsizliklar sabab davlat muassasalari va xizmatlarining aksariyati ishini to‘xtatgan.
RNZ radiostansiyasi ma’lumotlariga ko‘ra, Solomon orollarida 24-noyabr kuni hukumatga qarshi boshlangan norozilik namoyishlari Xoniaraning sharqiy hududlarini egallagan tartibsizliklarga aylanib ketgan. Shaharda mahsulotlar, dori vositalari va birlamchi tovarlar yetishmovchiligi kuzatilmoqda, qator tumanlarda elektr energiyasi va suv ta’minoti to‘xtatilgan.
Solomon orollari bosh vaziri Manasse Sogavare shahardagi namoyishlar hukumat tomonidan 2019-yilning kuzida qabul qilingan Tayvan bilan diplomatik munosabatlarni to‘xtatish to‘g‘risidagi qarorini ma’qullamaydigan “derjavalar” tomonidan tashkillashtirilganini ma’lum qilgan. “Xitoy bilan aloqalari rivojlanishini istamayotgan mamlakatlar diplomatik munosabatlarga kirishimizga, xalqaro huquq va BMT rezolyutsiyalariga rioya qilishimizga to‘sqinlik qilmoqda, aynan ular namoyishchilarni qo‘zg‘atib, qo‘llab-quvvatlayapti”, — deydi Sogavare.
Solomon Times nashri ma’lumotlariga ko‘ra, Xoniaraga hozirda Avstraliya federal politsiyasi xodimlari yetib kelgan va yaqin soatlar ichida Avstraliya Harbiy dengiz kuchlariga tegishli harbiy kemalarning biridan 43 nafar harbiy xizmatchi kelishi kutilmoqda. Solomon orollariga harbiy yordam ko‘rsatilishi haqida 25-noyabr kuni Avstraliya hukumati rahbari Skott Morrison ma’lum qilgan. Uning so‘zlariga ko‘ra, orol davlat hududiga Mudofaa vazirligi va federal politsiyaning 100 dan ortiq xodimi yuboriladi. Bu kabi harbiy yordam ko‘rsatish bo‘yicha qarorni Papua—Yangi Gvineya hukumati ham qabul qilib, qo‘shni davlatga 30 nafar tinchlikparvar kuchlarini yuborishga va’da bergan.
AFP agentligining yozishicha, politsiya xodimlari bosh vazirning xususiy qarorgohiga kirishga uringan norozilik namoyishi ishtirokchilarini quvish uchun ogohlantiruvchi o‘qlarni uzgan. Huquq-tartibot idoralari xodimlari olomonni tarqatib yuborishga va namoyishchilarni mamlakat poytaxti Xoniara markaziga qaytarishga muvaffaq bo‘lgan.
Solomon orollari politsiya komissari (RSIPF) Xoniara aholisini tartibsizlikka qo‘shilmaslikka va huquq-tartibot organlariga namoyishchilarni to‘xtatishda yordam berishga chaqirgan.
24-noyabr kuni Xoniarada hukumatga qarshi norozilik namoyishlarini o‘tkazayotganlar parlament binosini egallashga uringan va unga o‘t qo‘ygan. Huquq-tartibot organlari aralashuvidan keyin namoyishchilar do‘konlar, maktab va politsiya uchastkalariga o‘g‘irlikka tushib, ularni yoqa boshlagan. Ma’lum qilinishicha, norozilik aksiyasini arxipelag sharqida joylashgan Malaita provinsiyasi aholisi tashkillashtirgan. Ular hukumatni mintaqani rivojlantirishni istamaslikda va o‘z hududida bir qator yirik loyihalarni amalga oshirishdan bosh tortishda ayblamoqda.
Yangi Zelandiya hukumati Solomon orollari poytaxtida sodir bo‘layotgan tartibsizliklardan qattiq xavotirda ekanligini ma’lum qilgan. “Yangi Zelandiya chorshanba kunidan beri Xoniarada davom etayotgan voqealardan qattiq xavotirda. Mamlakatlarimiz o‘rtasida chuqur va mustahkam aloqalar mavjud, biz Solomon orollarining hukumati va xalqini qo‘llab-quvvatlaymiz”, — degan mamlakat tashqi ishlar vaziri Devid Parker.
Shuningdek, idora rahbari Yangi Zelandiya hukumati Avstraliyaning Xoniaraga federal politsiya va qurolli kuchlarni yuborish to‘g‘risidagi qarorini olqishlashini bildirgan.
Izoh (0)