Afrikada paydo bo‘lgan yanada xavfli shtamm Xitoyga “keldi”. Slovakiyada 14 kunlik lokdaun joriy qilindi. Koronaxabarlar

Jons Hopkins universiteti ma’lumotlariga ko‘ra, dunyoda koronavirusga chalinganlar soni 260 221 634 kishini tashkil qilmoqda, shularning 5 185 350 nafari vafot etgan. Ayni vaqtga qadar jahon bo‘yicha 7,544 milliard doza vaksina qo‘llangan.

Kasallanganlar soni bo‘yicha AQSh (48,1 million), Hindiston (34,5 million), Braziliya (22 million), Buyuk Britaniya (10 million) va Rossiya (9,3 million) eng oldinda bormoqda

Xitoydagi karantin mehmonxonasida koronavirusning Janubiy Afrikada paydo bo‘lgan yangi va xavfliroq shtammi (B.1.1.529) bilan kasallanish bo‘yicha ikkita holat aniqlandi. Ushbu shtamm Xitoyga Gonkongdagi Regal Airport karantin mehmonxonasiga joylashtirilgan odamlar bilan “kelgan”. Virus aniqlangan ikki kishi beshinchi qavatda bir-biriga qarama-qarshi xonalarda yashagan: birinchi bemor Gonkongga Janubiy Afrikadan kelgan. Bemorlar allaqachon kasalxonaga yuborilgan. Ularga qo‘shni xonalarda turgan 12 kishi endi Penny’s Bay markazida ikki haftalik qo‘shimcha majburiy karantindan o‘tishi kerak. Xitoy Sog‘liqni saqlash departamentining ma’lumotlariga ko‘ra, xuddi shu kuni Gonkong aeroportidagi Vaqtinchalik namunalar yig‘ish markazida ushbu shtammga chalinish bo‘yicha yana to‘rtta holat aniqlangan.

Britaniya va Isroil hukumati COVID-19 ning yangi shtammi tufayli Afrikaning bir qancha mamlakatlariga borishni taqiqladi. Buyuk Britaniya hukumati ma’lumotlariga ko‘ra, 26-noyabr kuni Janubiy Afrika, Botsvana, Esvatini, Lesoto, Namibiya va Zimbabve “qizil” ro‘yxatga kiritiladi. 28-noyabr kuni ertalab soat 04:00 ga qadar ushbu mamlakatlardan barcha to‘g‘ridan to‘g‘ri tijoriy va xususiy reyslar taqiqlanadi. Mazkur davlatlarda bo‘lib qaytgan britaniyaliklar 10 kun davomida mehmonxona karantinidan o‘tishi kerak bo‘ladi.

“Ushbu variant bilan bog‘liq birinchi belgilar u koronavirusning ‘hindcha’ shtammidan ko‘ra yuqumliroq bo‘lishi mumkinligini ko‘rsatmoqda. Shuningdek, mavjud vaksinalarning unga qarshi samaradorligi pastroq bo‘lishi mumkin”, — dedi Buyuk Britaniya sog‘liqni saqlash vaziri Sajid Jovid.

Isroil hukumati ham o‘z fuqarolariga Afrika janubiga sayohat qilishni, shuningdek, bu mintaqadan Isroilga chet elliklarning kirishini taqiqladi.

Reuters xabariga ko‘ra, Janubiy Afrika, Lesoto, Botsvana, Zimbabve, Mozambik, Namibiya va Esvatini Isroilning “qizil” yoki sayohat uchun eng xavfli mamlakatlar ro‘yxatiga qo‘shildi, bu ro‘yxat xorijiy davlatlardagi koronavirus darajasini aks ettiradi. Isroil Sog‘liqni saqlash vazirligidan maxsus ruxsat olmagan fuqarolarga qizil ro‘yxatga kiritilgan mamlakatlarga borish taqiqlanadi.

Ushbu chora-tadbirlar haqida e’lon qilgan Isroil bosh vaziri Naftali Bennet kanselyariyasida ma’lum qilinishicha, yuqoridagi yettita Afrika davlati fuqarolarining Isroilga kirishiga ruxsat berilmaydi. Qayd etilishicha, ushbu mamlakatlardan vataniga qaytgan isroilliklar kelganidan keyin 7 kundan 14 kungacha mehmonxonalarda karantindan o‘tishi shart bo‘ladi.

Slovakiya hukumati butun aholi, jumladan, COVID-19 dan tuzalgan va koronavirusga qarshi emlanganlar uchun ikki haftalik qat’iy lokdaun joriy qildi. Mamlakatda barcha umumiy ovqatlanish shoxobchalari yopildi,  oziq-ovqat mahsulotlari va zaruriy tovarlar sotiladigan do‘konlar, dorixonalar, yoqilg‘i quyish shoxobchalari va muhim infratuzilmaga ega do‘konlargina ishlashda davom etadi. Odamlarga faqat eng yaqin do‘konga, ishga, emlanishga yoki kasalxonaga borish uchun uylarini tark etishga ruxsat beriladi.

Universitet va kollejlar to‘liq, maktablar esa qisman masofaviy ta’limga o‘tkazildi. Itlarni yashash joyidan 500 metrdan uzoq bo‘lmagan masofada sayr qildirish mumkin. Hukumat 10 kundan keyin emlanganlar uchun ba’zi choralar yumshatilishini ma’lum qildi. Lokdaun bilan bir vaqtda Slovakiya hukumati harakat erkinligini cheklaydigan 90 kunlik favqulodda holat rejimini e’lon qildi. Mamlakatda komendantlik soati joriy etilmoqda: odamlarga soat 01.00 dan 05.00 gacha uylarini tark etish taqiqlangan. Hukumat shifoxonalardagi vaziyatni, shuningdek, SARS-CoV-2 bilan kunlik kasallanishlar sonini pandemiya boshidan beri eng yuqori cho‘qqiga chiqqan va o‘ta og‘ir deb baholamoqda.

Shuningdek, Germaniyada so‘nggi sutka davomida koronavirus yuqtirganlar soni o‘z rekordini yangiladi — 76 414 kishi. Mamlakatda COVID-19 bilan kasallanganlarning umumiy soni 5 650 170 nafarga yetdi. 24 soat ichida 357 nafar bemor koronavirusdan vafot etgan. Germaniyada pandemiya boshidan buyon infeksiya qurbonlarining umumiy soni 100 476 nafarga yetgan. Shu bilan birga, 4 775 300 kishi COVID-19 dan tuzalib ketgan.