Oilaviy ajrimlar statistikasi “u yoki bu ma’noda yaxshi ko‘rinishi” uchun harakat qilayotganlar yo‘q emas, ammo mahalla faollariga “haqiqiy zo‘ravonlik mavjud bo‘lgan oila”larni yarashtirishga harakat qilmaslik haqida tavsiyalar berilmoqda. Bu masalaga 26-noyabr kuni “Yangi O‘zbekistonda oilaviy zo‘ravonlikni oldini olish va oilaviy zo‘ravonlikdan jabr ko‘rganlarga amaliy ko‘mak berish: muammo va yechimlar” mavzusida o‘tkazilgan xalqaro konferensiyadan so‘ng tashkil etilgan matbuot anjumanida to‘xtalib o‘tildi.
Kuzatuvchilar ajrashish yoqasidagi oilalarni turli tashkilotlar yarashtirishga urinishi, masalan, jabrdiyda ayolga himoya orderi berish orqali uni zo‘ravon eridan himoyalash choralari ko‘rilgani bilan, tomonlar aynan ajrashish istagini bildirsa, bunga imkon bermaslikka harakat qilish holatlari oz emasligini ta’kidlaydi. Oktabr oyida Qashqadaryoning Yakkabog‘ tumanida sodir bo‘lgan hodisa ham shunga misol — er-xotin o‘rtasidagi muntazam janjal bo‘lgan, erkak rafiqasiga nisbatan ko‘p bora kuch ishlatgan, ayolga himoya orderi berilgan, ammo er order qog‘ozini yirtib tashlagan va oxir-oqibat ayolni navbatdagi janjal vaqti urib, o‘ldirib qo‘ygan.
Senatning Xotin-qizlar va gender tenglik masalalari qo‘mitasi raisi Malika Qodirxonovaning so‘zlariga ko‘ra, sudlarga ajrashish arizalari ko‘pincha “kichik maishiy sabablar” bilan topshiriladi. “Ammo mahalla vakillarini tegishli idoralar bilan birga o‘qitish jarayonida, agar oilada haqiqiy zo‘ravonlik bo‘lsa, turmush o‘rtog‘i haqiqatan ham zo‘ravon bo‘lsa yoki ma’lum tashkilotlarning hisobida tursa, bunday oilalarni yarashtirishga harakat qilmanglar, deb aytilyapti. Chunki hamma oilalarni ham yarashtirish kerak emas”, — dedi senator.
IIV Huquqbuzarliklar profilaktikasi bosh boshqarmasi boshlig‘i o‘rinbosari Umida Abdullayeva himoya orderi oilalarni majburiy yarashtirish vositasi emasligini, shu vaqtgacha himoya orderi berilgan 2 mingta nizoli oilaning 800 tasi oxir-oqibat baribir ajrashib ketganini ma’lum qildi. “Biz majburiy yarashtirmaymiz. Biror nizoli holat bo‘lsa, himoya orderi yordamida yechim topamiz, oila yarashadigan bo‘lsa, ularga imkon tashkil etamiz, bo‘ldi. Spirtli ichimlikka ruju qo‘ygan bo‘lsa, davolanishiga, ishsiz bo‘lsa, ish topishiga yordam beramiz”, — dedi polkovnik.
Bosh prokuror o‘rinbosari Svetlana Ortiqova esa kimlardir “u yoki bu ma’noda yaxshi ko‘rinish uchun” statistikani yashirishi mumkinligini tasdiqlab, bu holat stereotiplar bilan bog‘liqligini taxmin qildi. “Shu stereotiplardan hali to‘liq voz kecholganimiz yo‘q. Lekin voz kechish uchun juda katta qadamlar tashlanyapti. Ilgari mana shu mavzulardagi tadbirlarni o‘tkazishning o‘zi muammo edi, hozir esa bemalol — raqamlarni ham, holatlarni ham bafurja aytyapmiz”, — deya qo‘shimcha qildi Bosh prokuratura vakili.
Izoh (0)