Оилавий ажримлар статистикаси «у ёки бу маънода яхши кўриниши» учун ҳаракат қилаётганлар йўқ эмас, аммо маҳалла фаолларига «ҳақиқий зўравонлик мавжуд бўлган оила»ларни яраштиришга ҳаракат қилмаслик ҳақида тавсиялар берилмоқда. Бу масалага 26 ноябрь куни «Янги Ўзбекистонда оилавий зўравонликни олдини олиш ва оилавий зўравонликдан жабр кўрганларга амалий кўмак бериш: муаммо ва ечимлар» мавзусида ўтказилган халқаро конференциядан сўнг ташкил этилган матбуот анжуманида тўхталиб ўтилди.
Кузатувчилар ажрашиш ёқасидаги оилаларни турли ташкилотлар яраштиришга уриниши, масалан, жабрдийда аёлга ҳимоя ордери бериш орқали уни зўравон эридан ҳимоялаш чоралари кўрилгани билан, томонлар айнан ажрашиш истагини билдирса, бунга имкон бермасликка ҳаракат қилиш ҳолатлари оз эмаслигини таъкидлайди. Октябрь ойида Қашқадарёнинг Яккабоғ туманида содир бўлган ҳодиса ҳам шунга мисол — эр-хотин ўртасидаги мунтазам жанжал бўлган, эркак рафиқасига нисбатан кўп бора куч ишлатган, аёлга ҳимоя ордери берилган, аммо эр ордер қоғозини йиртиб ташлаган ва охир-оқибат аёлни навбатдаги жанжал вақти уриб, ўлдириб қўйган.
Сенатнинг Хотин-қизлар ва гендер тенглик масалалари қўмитаси раиси Малика Қодирхонованинг сўзларига кўра, судларга ажрашиш аризалари кўпинча «кичик маиший сабаблар» билан топширилади. «Аммо маҳалла вакилларини тегишли идоралар билан бирга ўқитиш жараёнида, агар оилада ҳақиқий зўравонлик бўлса, турмуш ўртоғи ҳақиқатан ҳам зўравон бўлса ёки маълум ташкилотларнинг ҳисобида турса, бундай оилаларни яраштиришга ҳаракат қилманглар, деб айтиляпти. Чунки ҳамма оилаларни ҳам яраштириш керак эмас», — деди сенатор.
ИИВ Ҳуқуқбузарликлар профилактикаси бош бошқармаси бошлиғи ўринбосари Умида Абдуллаева ҳимоя ордери оилаларни мажбурий яраштириш воситаси эмаслигини, шу вақтгача ҳимоя ордери берилган 2 мингта низоли оиланинг 800 таси охир-оқибат барибир ажрашиб кетганини маълум қилди. «Биз мажбурий яраштирмаймиз. Бирор низоли ҳолат бўлса, ҳимоя ордери ёрдамида ечим топамиз, оила ярашадиган бўлса, уларга имкон ташкил этамиз, бўлди. Спиртли ичимликка ружу қўйган бўлса, даволанишига, ишсиз бўлса, иш топишига ёрдам берамиз», — деди полковник.
Бош прокурор ўринбосари Светлана Ортиқова эса кимлардир «у ёки бу маънода яхши кўриниш учун» статистикани яшириши мумкинлигини тасдиқлаб, бу ҳолат стереотиплар билан боғлиқлигини тахмин қилди. «Шу стереотиплардан ҳали тўлиқ воз кечолганимиз йўқ. Лекин воз кечиш учун жуда катта қадамлар ташланяпти. Илгари мана шу мавзулардаги тадбирларни ўтказишнинг ўзи муаммо эди, ҳозир эса бемалол — рақамларни ҳам, ҳолатларни ҳам бафуржа айтяпмиз», — дея қўшимча қилди Бош прокуратура вакили.
Изоҳ (0)