Fransiya chempionatining 14-tur doirasida o‘tishi belgilangan “Lion” va “Marsel” o‘rtasidagi bahs mezbon jamoa muxlisining Dimitri Payetga suv idishi otishi tufayli to‘xtatildi.
Uchrashuvning dastlabki daqiqalarida “Lion” jamoasi muxlisi burchak zarbasini amalga oshirishga tayyorlanayotgan Dimitri Payetning boshiga suv idishi uloqtirdi.
Maydonga darhol shifokorlar tushdi.
Bosh hakam Ruddi Buke futbolchilarni maydondan olib chiqib ketdi, lekin usiz ham “Marsel” jamoasi maydondan chiqib ketmoqchi edi. Jurnalist Jyulen Loranning so‘zlariga ko‘ra, Liga 1 o‘yinni oxirigacha yetkazib qo‘yishni so‘ragan.
“Bu alohida vaziyat edi. Tartibsizlik keltirib chiqargan muxlis qo‘lga olindi. O‘yin davom ettiriladi. Ammo takroriy birinchi hodisadayoq o‘yin to‘xtatiladi. Biz sizga ishonamiz”, — deya e’lon qildi stadion suxandoni.
“Lion” o‘yinni davom ettirishga tayyor edi (futbolchilar chigal yozdi mashqlarini bajarish uchun chiqdi ham), lekin “Marsel” maydonga chiqishni istamadi.
Tyerri Anri g‘azabda: “‘Lion’ — ‘Marsel’ uchrashuvi — turning bezagi. Odamlar bu o‘yinni tomosha qiladi. Yana ahmoqlar sabab to‘xtatilgan o‘yinni ko‘ryapmiz. Inglizlar, ispanlar va italyanlar Fransiya chempionatida bunday voqealarni ko‘rishini xohlamayman”.
O‘yin qachon o‘tkazilishi ma’lum emas.
Ushbu holat yuzasidan Fransiya professional futbol ligasi (LFP) tartib-intizom qo‘mitasi dastlabki sanksiyalarni e’lon qildi. Unga ko‘ra, “Lion” keyingi uy o‘yinini muxlislarsiz stadionda o‘tkazadi. Keyingi sanksiyalar, o‘yinni o‘tkazish yoki o‘tkazmaslik masalasi borasidagi yakuniy qaror 8-dekabrda e’lon qilinadi.
Fransiya stadionlarida tartibsizliklar tez-tez sodir bo‘ladi. Bu mavsum ularning uchtasida “Marsel” ishtirok etgan
Fransiyalik muxlislar tribunada tartib-intizom saqlashni unutib qo‘yadi, 2021/22-yilgi mavsumda bu jiddiyroq tus oldi.Liga 1 ning uchinchi turi doirasidagi “Nitssa” — “Marsel” uchrashuvi qahramoni ham Dimitri Payet bo‘lgandi.
75-daqiqada Dimitri Payet o‘zi tomon uloqtirilgan buyumni tribunaga qayta otganidan so‘ng, bir nechta muxlis maydonga yugurib chiqadi. “Marsel” futbolchilari Payetni himoya qilib, ularga qarshi chiqadi.
Hatto, Sampaolining yordamchisi Xorxe Desio “Nitssa” muxlisining yuziga zarba beradi. Ikkala jamoa ham kiyim almashtirish xonasiga yo‘l oladi, “Nitssa” prezidenti Jan-Pyer River muxlislarni stadionni tark etishga ko‘ndiradi. “Marsel” o‘yinni davom ettirishni istamadi va uchrashuv 27-oktabrda Truada qaytadan o‘tkazildi.
22-sentabrda chempionatning 7-turida “Anjer” — “Marsel” (0:0) bahsidan so‘ng muxlislarning ommaviy to‘qnashuvi yuz berdi. Marsellik muxlislar final hushtagidan so‘ng maydonga yugurib chiqdi.
30-sentabr Yevropa Ligasidagi “Marsel” — “Galatasaroy” (0:0) o‘yini tribunadagi tartibsizliklar sabab bir muddat to‘xtatildi. Birinchi bo‘limda ikkala jamoa muxlislari bir-biriga fayerlar uloqtirdi, shu sababli o‘yin 8 daqiqa to‘xtab qoldi.
Ushbu voqea sabab Fransiya politsiyasi “Marsel” muxlislariga 9-turda bo‘lib o‘tgan “Lill”ga qarshi safar o‘yiniga borishni taqiqlab qo‘ydi.
Fransiya chempionatining 11-turida “Sent-Etyen” va “Anjer” o‘rtasidagi bahs rejalashtirilganidan bir soat keyin boshlandi. O‘yin oldidan mezbonlar muxlislari jamoa rahbariyati va murabbiy Klod Pyuelning qarorlariga qarshi namoyish o‘tkazdi. Ular maydonga fayerlar otdi va darvoza to‘rlarini yoqib yubordi. Hakam Antoni Gotye jamoalarni maydondan olib chiqib ketdi, stadion xodimlari esa darvoza to‘rlarni almashtirishga kirishdi.
24-oktabrda yana Marselda ko‘ngilsiz voqea sodir bo‘ldi. “PSJ”ga qarshi o‘yinda muxlislar maydonga turli buyumlarni uloqtirdi, natijada politsiya xodimlari burchak zarbasi tepayotgan Neymarni qalqonlar bilan himoyalashiga to‘g‘ri keldi.
Qayg‘uli statistika: “Marsel”ning Liga 1 da yettita mehmondagi o‘yinidan uchtasida tribunadagilar maydonga turli predmetlarni uloqtirdi, Marselda bo‘lib o‘tgan o‘yinlarning ikkitasida esa mahalliy muxlislar tartibsizlik keltirib chiqardi.
Izoh (0)