Dunyo va o‘zbek sportiga oid 22-noyabrning eng muhim xabarlari dayjesti bilan tanishing.
O‘zbekiston
Murodjon Ahmadaliyev tantanali ravishda kutib olindi
AQShda bo‘lib o‘tgan jangda WBA va IBF kamarlarini himoya qilgan Murodjon Ahmadaliyev (10-0, 7 KO) 22-noyabr kuni Toshkentda tantanali ravishda kutib olindi.
Kutib olish marosimida O‘zbekiston boks federatsiyasi rahbariyati, Milliy gvardiya qo‘mondonligi, OAV vakillari, bokschining yaqinlari va muxlislar ishtirok etdi.
Murodjon Toshkent vaqti bilan 20-noyabr tongida bo‘lib o‘tgan jangda chililik Xose Velaskesni mag‘lub etib, kamarlarini himoya qilgandi.
Superliga tark etadigan ikkita klubi nomi ma’lum bo‘ldi
20 va 21-noyabr kunlari futbol bo‘yicha O‘zbekiston chempionatining 25-tur bahslari o‘tkazildi. Tur yakunlariga ko‘ra, Superligani to‘g‘ridan to‘g‘ri tark etadigan ikkita jamoa nomi ma’lum bo‘ldi.
Superliganing 12-o‘rindagi jamoasi va Pro-Liganing uchinchi jamoasi o‘rtasida o‘tish uchrashuvi o‘tkaziladi. Unda g‘olib bo‘lgan jamoa Superliganing kelasi mavsumida ishtirok etish huquqini qo‘lga kiritadi. Pro-Ligada uchinchi o‘rinni “Olimpik” jamoasi egalladi. Superligadagi 12-o‘rin egasi esa so‘nggi turdan so‘ng aniq bo‘ladi. Ayni vaqtda “Mash’al”, “Surxon” va “Metallurg” xavfli hududda bormoqda.
PFLning ma’lum qilishicha, o‘tish o‘yini 2-dekabr kuni Toshkentdagi “Jar” stadionida bo‘lib o‘tadi.
Jahon
Garet Sautgeyt Angliya terma jamoasi bilan amaldagi shartnomasini uzaytirdi
51 yoshli mutaxassis Angliya bilan amaldagi shartnomasini 2024-yilning yoziga qadar uzaytirgan. Xabarlarga ko‘ra, mutaxassis yangi bitim bo‘yicha yiliga 5 mln funt maosh oladi.
Sautgeyt Angliya termasini 2016-yilda qabul qilib olgandi. U bilan jamoa JCh—2018 yarim finali va Yevro—2020 finaliga qadar yetib bordi.
Liga 1 da navbatdagi mojaro
Fransiya chempionatining 14-turi doirasida bo‘lib o‘tishi belgilangan “Lion” — “Marsel” uchrashuvi 5-daqiqadayoq to‘xtatib qo‘yildi.
“Marsel” yarim himoyachisi Dimitri Payet burchak zarbasini ijro etayotgan vaqtda tribunadan uloqtirilgan suv idishi uning boshiga teggan. Hakam shundan keyin o‘yinni to‘xtatgan. Uzoq vaqt muhokamalardan keyin o‘yin o‘tkazilmasligi ma’lum qilingan.
“O‘yinchilar xavfsizligi kafolatlanmagani bois hakam uchrashuvni davom ettirmaslik qaroriga kelgan. Biz o‘yinni davom ettira olmaymiz”, — degan stadion suxandoni.
Ushbu masala tartib-intizom qo‘mitasiga oshirilgan. “Lion” buning ortidan texnik mag‘lubiyat qabul qilib olishi ham mumkin.
Avvalroq “Nitssa” va “Marsel” o‘rtasidagi uchrashuvda ham shunga o‘xshash tartibsiz yuzaga kelgandi. Unda ham Payet tomon tribunadan buyum uloqtirilgan, futbolchi ushbu buyumni olib muxlislar tomon otgandi. Shundan keyin tomoshabinlar maydonga chiqib ketgan va ommaviy mushtlashuv kelib chiqqandi. Yakunda o‘yin oxiriga bormay yakunlangan va “Nitssa”ga texnik mag‘lubiyat yozilgandi.
Yilning eng yaxshi yosh o‘yinchisi aniqlandi
“Barselona” yarim himoyachisi Pedri Tuttosport nashri tomonidan yilning eng yaxshi yosh o‘yinchisiga topshiriladigan Golden Boy sovriniga ega chiqdi.
Pedri o‘tgan mavsum top-5 ligalar o‘yinchilari orasida eng ko‘p maydonda harakat qilgan futbolchi bo‘lgandi. Katalonlar safidagi to‘liq mavsumdan keyin u Ispaniya bilan Yevro va Olimpiya o‘yinlarida ishtirok etdi.
“Bavariya” vaksinatsiyadan o‘tmagan futbolchilariga karantin vaqtida maosh to‘lamaydi
Myunxenliklar klubi emlanmagan futbolchilar izolyatsiya yoki karantinda bo‘lgan vaqt uchun maosh to‘lamoqchi emas.
Futbolchilar Erik-Maksim Shupo-Moting, Mikael Kyuizans, Serj Gnabri, Jamal Musiala va Yozua Kimmix rahbariyat majlisiga chaqirilgan. “Bavariya” rahbariyati futbolchilarga karantinda bo‘lgan muddat uchun pul to‘lanmasligini ma’lum qilgan, deya xabar qilmoqda Sport1.
Bu futbolchilar orasida tushunmovchilikni keltirib chiqargan. Mazkur qaror tufayli hozirga qadar ikki marta karantinga olingan Kimmix 768 ming yevro yo‘qotishi mumkin.
Xavi sobiq shogirdini “Barselona”da ko‘rmoqchi
Ispaniyalik mutaxassis “As-Sadd” hujumchisi Bag‘dod Buneja transferini xohlamoqda, deya xabar qilmoqda Diario Sport. Klub hujum chizig‘idagi yo‘qotishlar va cheklangan moliyaviy imkoniyat sabab ushbu variantni ko‘rib chiqmoqda.
Xavi jazoirlik futbolchi bilan “As-Sadd”da birga ishlagan. Buneja Qatar klubida 2015-yildan buyon to‘p surib keladi. Bu vaqtda u Qatar chempionatida 108 o‘yin o‘tkazib, 128 ta gol urishga erishgan.
Eslatib o‘tamiz, katalonlarning markaziy hujumchilari Martin Breytueyt va Serxio Aguero ayni vaqtda lazaretda bo‘lib turibdi.
“Bavariya” Pedrini sotib olmoqchi
Myunxenliklar klubi “Barselona” yarim himoyachisiga qiziqish bildirmoqda, deya xabar qilmoqda AS.
“Bavariya” 18 yoshli futbolchining vakillari bilan boshlanishga ulgurgan. Nemis klubi unga katalonlarga nisbatan 4 barobar ko‘p maosh taklif qilmoqda. “Bavariya” buning uchun o‘z transfer rekordini yangilashga tayyor. Ayni vaqtda Myunxen klubining eng yirik xaridi 2019-yil “Atletiko”dan 80 million yevroga sotib olingan Lyuka Ernandes bo‘lib turibdi.
Izoh (0)