Yulduzlarning xarajatlari: mashhurlar birinchi gonorariga nima sotib olgan?

Faoliyati davomida ko‘plab muxlislar qalbidan joy olgan shou-biznes vakillari debyut ishi uchun to‘langan mablag‘ni nimaga sarflagani haqida Harper’s Bazaar nashri ma’lumot beradi.

Donald Glover

Donald kollejdagi talabalik davridayoq “Studiya 30” nomli serialda ssenariy muallifi sifatida ish boshlagan. “Do‘stlarimga qaraganda menda pul ko‘proq edi, ammo men o‘ylamasdan, ko‘kka sovurganman. Juda ham yosh edim. Rostini aytsam, o‘zim uchun konfet sotib olganman. Bolaligimda menga taqiqlaganlari sabab ham o‘zimni konfet bilan siylashga qaror qilganman”, – degan u.

Kaleb Maklaflin

Yetti yoshida “Juda g‘alati ishlar” (Stranger things) serialida suratga tushgan aktyor ilk gonorariga yangi sport oyoq kiyimi sotib olgan. U Nike brendining “Jordanning qanotlari” nomli krossovkasini xarid qilganini ta’kidlagan.

Jonni Depp

Intervyularidan birida Depp yulduz bo‘lganidan keyin qo‘lga kiritgan birinchi mablag‘iga onasi uchun Leksingtondan uzoq bo‘lmagan yerdan ferma sotib olganini ma’lum qilgan.

Nikol Kidman

“Birinchi maoshimga ota-onam uchun kir yuvadigan mashina sotib olganman. Keyin esa menga hayotimdagi eng ajoyibdek tuyilgan poyabzalni xarid qilganman.

Jennifer Lopes

Klubda ishlagan vaqti Kinen Ayvori Uayans bergan Honda’da yurgan Lopes aynan shu mashinada kastingga borgan. Birinchi marta to‘langan katta miqdordagi mablag‘ni esa Mercedes sotib olish uchun sarflagan.

Serena Uilyams

Mashhur tennischi Serena esa olgan birinchi gonorarini sarflamasdan, bankka qo‘yishni afzal bilgan.

Eshli Grem

Birinchi katta xaridni Chanel’dan tufli sotib olishdan boshlagan Eshli pulining aksariyat qismini shaxsiy trener uchun sarflaganini ma’lum qilgan.

Bred Pitt

“Aktyor sifatida birinchi maoshimni qo‘lga kiritganda uni Frenk Lloyd Raytning eski stuli va lampasini sotib olishga sarflaganman. Ikkinchi maoshimga esa stereo xarid qilganman”, – degan aktyor.

Bri Larson

Aktrisa Bri Larson esa boshqalardan farqli o‘laroq, mablag‘ini ko‘k rangli elektrogitaraga sarflagan.

Sindi Krouford

Supermodel Sindi Krouford bo‘lsa, pullarini uyini ta’mirlash uchun ishlatgan.

Rami Malek

Rami esa qahvaxo‘rlarga xos tanlov qilgan. “Birinchi maoshimni o‘zim uchun qahva mashinasi olishga sarflaganman”, – degan u.