Odam odamga o‘xshaydi, deyishadi. Biroq ba’zida shunday vaziyatlarga duch kelamizki, kim aslida kim ekanini ajratish mushkul bo‘lib qoladi. Quyida xorijiy va o‘zbekistonlik mashhurlarga ikki tomchi suvdek o‘xshaydigan insonlar haqida so‘z yuritamiz.
Qaysi biri Aishvariya Ray?
Mashhur hind aktrisasi, “Dunyo go‘zali” Aishvariya Bachchanning O‘zbekistondagi qiyofadoshi Nargiza Azizova “Assalom O‘zbekiston” ko‘rsatuvining boshlovchisi hisoblanadi. U aka Sharif nomi bilan tanilgan aktyor Tolib Xojiyevning qizi. Ikki farzandning onasi bo‘lgan teleboshlovchi hind aktrisasiga havas qilishini yashirmaydi.
— Hind aktrisasiga o‘xshashimni bilganimga ko‘p bo‘lmadi. Akademik litseyda o‘qishga borganimda kursdoshlarim “Devdas”dagi Paroga o‘xshashimni aytishgandi. Bu filmni ko‘rmaganim va hind kinosiga unchalik qiziqmaganim uchun gaplariga e’tibor bermadim. Oradan ancha vaqt o‘tib tasodifan televizorda namoyish etilayotgan “Devdas” filmiga ko‘zim tushib qolgan. Haqiqatan hind aktrisasiga o‘xshashimni o‘shanda bilganman. Atayin taqlid qilmayman, ammo unga havasim keladi. U idealimdagi ayol desam ham bo‘ladi, — deydi Nargiza Azizova.
“Rayhonning egizagi bormidi?”
Muhabbat Oripova haqiqatan ham xonanda Rayhonga o‘xshaydi. Ba’zilar aytgandek, balki u ham xonandaning imijiga taqlid qilar. Ammo unga qarab, tabiiy o‘xshashliklarni ham payqashingiz aniq. Muhabbat asli farg‘onalik, bir necha yildan buyon Toshkent shahrida istiqomat qiladi.
“Rayhonmisiz degan savolni ko‘p berishgan. Ba’zilar savol bermay zimdan kuzatish, paparatsi qilib suratga olish holatlari ham ko‘p bo‘ladi. Ilk marta Rayhonga o‘xshashligimni Rayhonning Qo‘qondagi konsertida bilganman. Havo sovuqligi uchun Rayhon muxlislari bilan ko‘risholmagan. Shunda bitta muxlis meni ko‘rsatib “Mana Rayhon” degan va hamma kelib men bilan rasmga tushgan. Bunday holatlar ko‘p marta bo‘lgan”, — deydi Muhabbat Oripova.
“Mabodo, Uchqun Tillayevning ukasi emasmisiz?”
O‘zbekistonda xizmat ko‘rsatgan artist Uchqun Tillayevning o‘zi kabi ijodkor qiyofadoshi Samarqandda istiqomat qiladi. Hayot Hamidov bir necha yillardan buyon Samarqand viloyatidagi Hamid Olimjon teatrida aktyor sifatida faoliyat yuritadi.
“Mabodo, Uchqun Tillayevning qarindoshi emasmisiz, degan savollarni ko‘p berishgan. Bir kuni to‘yda bir odam kelib ‘Siz anuv aktyorga o‘xshar ekansiz?’ dedi. Asabiylashib turganim uchunmi qaysi aktyorga deb balandroq gapirib yuboribman. Nima deyishini bilmay ‘Bitta aktyor sizga o‘xshaydi!’ dedi. Ana endi to‘g‘ri aytdingiz, deb kulgandim”, — deydi Hayot Hamidov.
Munisa Rizayevaning rossiyalik “opasi”
Munisa Rizayevani ko‘pchilik rus estrada vakili Zaraga o‘xshatishadi. Ochig‘ini aytish kerak, ilgari haqiqatan ham o‘xshashlik darajasi yuqori edi. Ammo keyingi paytlarda Munisa Rizayevaning lablari “biroz” kattalashgan. Ammo ikki ijodkorning tashqi qiyofasida qandaydir umumiylik bor.
Shakiraning o‘zbekistonlik qiyofadoshi
Shubhasiz, aktrisa Maftuna Xolmurodova Shakiraga taqlid qiladi. Chunki uning avvagi qiyofasi butunlay boshqacha edi. Bilishimizcha, u bir necha yil Sevinch Mo‘minovaga taqlid qilib, uning qo‘shiqlarini kuylab yurgan. Ammo Shakira ijrosidagi chiqishlari omadliroq chiqqach, “O‘zbek Shakirasi” nomini olish uchun intilgan. Qiyofada natijalar omadsiz emas, ammo bunday imij va raqslar o‘zbek san’ati uchun kerakmi, degan jumboqli savol bor.
Oz bo‘lsa-da o‘xshashlik bor-ov!
Negadir ko‘pchilik xonanda Sherbek Shodiyevni mashhur futbol yulduzi Messiga o‘xshatishadi. Rasmlarni solishtirsa haqiqatan ham qandaydir o‘xshashlik bor.
Qaysi biri Zarina Nizomiddinova?
Qiziqchi Zokir Ochildiyev “Izoh sizdan” deya mazkur suratni Instagram profiliga joyladi. Muxlislarning aksariyati suratdagi insonni marhum ijodkor Hojiboy Tojiboyevga o‘xshatdi. Ayrimlar uning Qashqadaryo viloyatida iste’qomat qilishi, uni odamlar ko‘p yillardan buyon Hojiboy Tojiboyevga o‘xshatishlari haqida izoh qoldirdi.
Ulug‘bek Ziyovuddinovni Sherali Jo‘rayevga o‘xshatishadi
Ulug‘bek Ziyovuddinov Ulug‘bek Mirzo taxallusi bilan ijod qiladi. Uning nafaqat tashqi ko‘rinishi, balki tor chalishi ham ustoz san’atkorni eslatadi.
“Alloh bandani bir-biriga o‘xshatadi. Bir qiyofadas yuz minglab odamlarni yaratishi mumkin. Tashqi ko‘rinishidan tortib, fe’l-atvorigacha bir xil bo‘lishi mumkin. Ulug‘ ustoz tirik afsona, san’at koinotida suzib yurgan quyoshdek. Go‘dakligimdayoq ustozning o‘ziga ham, san’atiga ham havas qilganman. Chin dildan havas qilsangiz, Alloh beradi. Ustozning o‘zini, qo‘shiqlarini, avlod-ajdodlarini yaxshi ko‘ramiz, ular uchun doim duodamiz”, — deydi Ulug‘bek Ziyovuddinov.
Izoh (0)