Muxlislarga “Niqob” filmidagi roli bilan yaxshi tanish bo‘lgan Gollivud yulduzi Kemeron Diazning hayoti haqida ma’lumot berib o‘tamiz.
1972-yil 30-avgustda AQShning San-Diego shahrida tavallud topgan Kemeronning otasi Emilio neft qazib olish kompaniyasining ishchisi bo‘lgan. Onasi Billi Joan esa savdo kompaniyasida broker sifatida faoliyat yuritgan. Aktrisaning Maykl ismli akasi va Shimen ismli opasi bor. Long Beach Polytechnic maktabida ta’lim olgan. Ammo politexnikaga ixtisoslashgan maktabdan ko‘ngli to‘lmagan Diaz, ko‘proq kinoga qiziqqan.
Karyera
Ko‘ngilochar tadbirlardan birida fotograf Jef Dyunass bilan tanishgan 16 yashar Kemeronning hayoti shundan keyin o‘zgarib ketgan. Jefning modellik agentligida ishlash taklifiga rozi bo‘lganidan so‘ng Calvin Klein, Levi’s va Coca-Cola singari mashhur brendlar bilan hamkorlik qilgan, surati jurnal muqovalarida chop etila boshlagan.
Uning kinodagi debyuti 1994-yilda bo‘lgan. Aktrisa “Niqob” (The Mask) filmida bosh qahramonni o‘ynaganidan keyin mashhurlikka erishgan. “Charli farishtalari” (Charlie’s angels)da Dryu Berrimor va Lyusi Lyu bilan ijro qilgan maxsus josus roli ham avvalgidan kam omadli chiqmagan. Jud Lou bilan birga ko‘rinish bergan “Ta’tillar almashganda” (The Holiday) filmi ham muxlislar qalbidan joy olgan. Ayni vaqtda ham suratga tushishda davom etayotgan Diaz, multfilm qahramonlariga ham ovoz beradi. “Shrek” multfilmidagi Fiona ham aktrisaning ovozi bilan gapirgan.
Shaxsiy hayot
Uning ilk jiddiy munosabatlari prodyuser Karlos De La Tore bilan bo‘lgan. Besh yildan so‘ng ajrashganiga qaramay, do‘stona aloqalarini saqlab qolgan. Uch yil uchrashib yurgan Mett Dillon bilan xayrlashganidan keyin Jared Leto bilan unashtirilgan. 2003-yilda nuqta qo‘yilgan munosabatlar to‘ygacha yetib bormagan. Keyin o‘zidan 8 yosh kichik Jastin Timberleykka ko‘ngil qo‘ygan. 2007-yilda turmush qurishi kerak bo‘lganiga qaramay, ushbu sanaga qadar har ikkisi boshqa yo‘llardan ketishga qaror qilgan. Shundan so‘ng Aleks Rodriges bilan qisqa muddat uchrashib yurgan. 2015-yilda Good Charlotte guruhi a’zosi, musiqachi Benji Medden bilan oila qurgan. 2019-yil aktrisa ilk bor ona bo‘lgan. Dunyoga kelgan qizaloqqa Reddiks Medden deb ism qo‘ygan.
Izoh (0)