Қашқадарё вилоятининг Яккабоғ туманида фаолият юритувчи блогер Элмурод Одилов Яккабоғ тумани ҳокими Лутфиддин Абдуллаев ишдан бўшаш учун вилоят раҳбари номига ариза ёзганини, аризага тумандаги блогерларнинг унга босим ўтказаётгани асос бўлганини ёзди. Ҳокимлик ахборот хизмати эса буни бўҳтон деб атамоқда.
«Ҳозир туман ҳокими билан шу ҳақда гаплашдим. Ҳоким бу ғирт бўҳтон эканини маълум қилди», — дейди Яккабоғ ҳокими матбуот котиби Шерзод Ҳасанов.
Бу ҳақда фикр билдирган тумандаги блогерларнинг бири Ўралжон Камолов «ҳоким ишдан кетса ҳам бизни айбдор қилмасин», деса, автоблогер Мақсуд Музаффаров эса «ҳоким автоблогерлар олиб чиққан барча муаммоларни, жумладан, тумандаги светофорга эҳтиёж бор чорраҳаларга светофор ўрнатиб чиқди», — дейди.
Блогер Элмурод Одилов бироз ўтгач, шахсий Telegram каналидаги мазкур постини таҳрирлаб, буткул ўзгартирди.
Эслатиб ўтамиз, Яккабоғ тумани раҳбарларининг интернетда шов-шувли чиқишлари 2019 йил июль ойидан бошланган. 2019 йил туманда фаолият юритувчи тадбиркор дўконини бузмоқчи бўлган ҳоким ўринбосарини ёқиб юбориб, жамоатчилик эътиборини тортган бўлса, тадбиркорлар ҳоким ўринбосари 30 га яқин дўконни бузиб, компенсация тўламаганини билдирганди. 2020 йил 19 май куни туманда иш бошлаган Лутфиддин Абдуллаев эса интернетда метан заправка қурган тадбиркор аёл ҳасратига сабаб бўлиши билан танилган бўлиб, 311 миллион сўмлик Captiva харид қилмоқчилиги билан шов-шувлар гирдобида қолганди.
Куни кеча ЙТҲга учраган ана шу Captiva эса анча тинчиб қолган шов-шувларни яна қўзғади.
Изоҳ (0)