O‘zbekiston Prezidentining farmoniga asosan Sherzod Shermatov axborot texnologiyalari va kommunikatsiyalarini rivojlantirish vaziri lavozimiga tayinlandi. Bu haqda vazirlik matbuot xizmati xabar berdi.
Avvalroq Oliy Majlis Qonunchilik palatasi deputatlari axborot texnologiyalari va kommunikatsiyalarini rivojlantirish vaziri lavozimiga shu kunga qadar xalq ta’limi vaziri lavozimida ishlab kelayotgan Sherzod Shermatov nomzodini ma’qullagan edi. Eslatib o‘tamiz, 3-noyabr kuni ijtimoiy tarmoqlar bloklanishi ortidan prezident farmoni asosida Axborot texnologiyalari va kommunikatsiyalarini rivojlantirish vaziri Shuhrat Sodiqov lavozimidan ozod etilgandi.
Ma’lumot uchun, Sherzod Shermatov 2018-yilning iyunidan buyon xalq ta’limi vaziri lavozimida ishlab kelayotgandi. U 2014-yildan 2016-yilning noyabrigacha Toshkentdagi Inha universiteti rektori bo‘lgan, 2016-yil noyabridan 2017-yil fevraligacha esa axborot texnologiyalari va kommunikatsiyalarini rivojlantirish vazirining birinchi o‘rinbosari, 2018-yilning fevraligacha AKT vaziri, innovatsion rivojlanish vazirining o‘rinbosari sifatida ishlagan.
O‘zbekistonning Xitoydagi sobiq elchisi Baxtiyor Saidov esa xalq ta’limi vaziri lavozimiga tayinlangan.
Izoh (0)