Baxtiyor Jahongirovich Islomov O‘zbekiston prezidentining huquqni muhofaza qiluvchi va nazorat organlari faoliyatini muvofiqlashtirish masalalari bo‘yicha maslahatchisi lavozimiga tayinlandi. Prezident matbuot kotibi Sherzod Asadov 15-noyabr kuni qoldirgan xabarga ko‘ra, bu haqdagi tegishli farmoni prezident Shavkat Mirziyoyev tomonidan imzolangan.

Baxtiyor Islomov.

Foto: “Gazeta.uz”

Islomov ushbu tayinlovga qadar prezidentning fuqarolar huquqlarini himoya qilish va murojaatlar bilan ishlash masalalari bo‘yicha maslahatchisining birinchi o‘rinbosari lavozimida ishlab kelayotgan edi.

Rustam Inoyatov.

Foto: “Daryo” / Madina Nurman

“Gazeta.uz”ning aniqlik kiritishicha, Rustam Inoyatov 2018-yil avgustidan buyon prezidentning huquqni muhofaza qiluvchi va nazorat organlari faoliyatini muvofiqlashtirish masalalari bo‘yicha maslahatchisi lavozimida ishlab kelayotgan edi. Bungacha Inoyatov prezidentning siyosiy-huquqiy masalalar bo‘yicha davlat maslahatchisi lavozimida ishlagan, bu lavozimga esa 2018-yil yanvarida Milliy xavfsizlik xizmati raisi lavozimidan ozod etilgach tayinlangan edi.

Rustam Inoyatovning yangi lavozimi haqida hozircha axborot yo‘q.